Мæнæ ацы къам фыдбылызæй 10 минуты раздæр ист æрцыд. Годжыцаты Сосланыл срæмыгъта минæ. Уыцы райсом йæ æртæ æфсæддон хæларимæ куыд æрвылбон, афтæ лæууыд пункты, сæ зæрдæйы ахаст уыд рог æмæ хъæлдзæг, иумæйагæй сæ къам сисын дæр уымæн сфæнд кодтой. Йæ мадмæ ма хъусынгæнинаг дæр арвыста. «Запорожьейы облæсты сабыр у, дæ зæрдæ ма ‘хсайæд». Æмæ мæнæ цæсты фæныкъуылдмæ йæ цард цæхгæр фæивта. Уыцы минутты æнкъарæнтæ æфсæддон хорз хъуыды кæны. Уыны, йæ къах уæрагæй дæлæмæ йæ уæлæ нал ис, фæлæ йæ уæддæр цыма æмбæрста, афтæ. Йæ æфсæддон хæлæрттæ сармадзаны схъиуæггæгтæй фæцæфтæ сты. Ахæм уавæры дæр Сослан йæхиуыл нæ, фæлæ йæ æмбæлттыл хъуыды кодта. Ацы уæззау цауы тыххæй ссæдзаздзыд лæппу æнæ æнкъарæнтæй дзуры, уыдон баззадысты тохы быдыры. Фыдбылызы бынатæй йæ æдас ранмæ аластой, йæ къах ын гуцъулайæ сбастой. Фæстæдæр куыд рабæрæг, афтæмæй, уыцы бынаты дыууæ ‘рдыгæй дæр ноджы уыд минæтæ.
Цæфы фæстæ йын йæ рахиз къах уæрагæй дæлæмæ алыг кодтой, йæ галиу зæнджы хæцъæфтæ фескъуыдысты. Кæд ныртæккæ Сослан дыккаг къæпхæны инвалид у, уæддæр батальон «Сæрмæт»-ы рæстæджытæ арæх æрхъуыды кæны. Сæрмагонд æфсæддон операцийы архайæг цæфтæ райста 2022-æм азы декабры. Мобилизацигонд та æрцыд октябры. Æртæ операцийы фæстæ, кæд йæ æнæниздзинад фæцудыдта, уæддæр æрыгон нæлгоймаг фæсмон кæны, æфсæддон операцийы бынаты, ахæм гыццыл рæстæг кæй фæци, ууыл. Донмæ цалдæр километры дарддæр куыд цыдысты, уый дæр мидбылхудгæ мысы. Ныртæккæ Сослан фæсчъылдымы архайы, лæппутæн баххуыс кæныныл. Уыдоныл Талисман, зæгъгæ, фæсном хуымæтæджы нæ сæвæрдтой.
Сослан иунæг фырт у. Йæхæдæг куыд зæгъы, афтæмæй йæ сæрмагонд æфсæддон операцийы бынатмæ фæндыд бархионæй ацæуын, фæлæ йæ ныййарджытæ нæ уагътой. Уæд лæппу хъæддыхæй загъта, мобилизацийы рæстæг æм куы фæсидой, уæд нал ныллæудзæн. Æцæг ирон лæппу. Йæ зондахаст æмæ йæ æгъдауæй дæр. Куыддæр ын иу фадат фæцис, афтæ иу йæ мадмæ сдзырдта, йæ хъуыддæгтæ иу ын бæстон нæ радзырдта, фæлæ иу ын ныфсытæ авæрдта. Ныййарæг мады зæрдæ зонаг у фæзæгъынц. Уымæн йæ хъуыдытæ æппынæдзух йæ хъæбулимæ баст уыдысты.
Ацы кадрты зыны, Сослан ногæй цæуын куыд ахуыр кæны, уый. Лæппуйы йæ къæхтыл слæууын кодтой академик Бурденкойы номыл нейрохирургийы медицинон иртасæн центры. Мæскуыйаг дохтыртæ йын сцæттæ кодтой сæрмагонд протез. Цæфты фæстæ хъæддых къахдзæфтæ нæ кодта. Тыхс, хæдтулгæ куыд скъæрдзæн, ууыл. Сослан хæдзармæ ссыд 18-æм майы. Æмæ дыккаг бон машинæйыл йæ хъуыддæгты фæдыл йæхæдæг ацыд.
Сæрмагонд æфсæддон операцийы архайæг куыд радзырдта, афтæмæй алы æхсæв акъоппы дæ сæрмæ нæмгуыты æхситт, афтæмæй куы бадай, уæд цардмæ æндæр хуызы кæсын райдайдзынæ. Мæскуыйы лæппу йæ уарзон чызгæн бинонтæ скæныны фæдыл йæ хъуыдытæ раргом кодта. Дианæ иу альбомы сæмбырд кодта Сосланы къамтæ сæрмагонд операцийы бынатæй. Хуызистытæй уæлдай ма Сосланы фыст æмдзæвгæтæ дæр.
Нæ хъатармæ фидæнмæ бирæ пълæнттæ ис. Фæнд кæны бинонтæ скæнын. Æфсæддоны фæнды спорты хи бафæлварын. Уый тыххæй йæ хъæуы сæрмагонд спортивон протез. Фарстайыл «Фыдыбæстæ хъахъхъæнджытæ» фонды архайынц. Сослан ма скодта хи музыкалон студи. Ныртæккæ фыссы рэп. Йæ фæстаг зарæг снысан кодта йæ æфсæддон хæлæрттæн. Сослан æй ныффыста ныккæнды бадгæйæ. Уæд лæппутæн дзырд радта, кæй йæ рауадздзæн, уый. Ныр ацы зарæг сси йæ уарзондæр, йæ мысинæгтæ сты, йæ æфсæддон хæлæрттимæ цы рæстæг арвыста, уый.
