Грознайы райдыдта дыккаг Кавказаг инвестицион форум. Уый баиу кодта 4 мин архайæгæй фылдæр 50 бæстæйæ. Форумы фæлгæты байгом равдыст дæр. Цæгат Кавказы федералон зылды 10 регионы райтыгътой форумы фæзты сæ стендтæ. Бавдыстой дзы сæ сæйраг æнтыстдзинæдтæ æмæ вазыгджын проекттæ. Цæгат Ирыстоны стенд дæр рауад цымыдисаг. Æвдисы республикæйы 5 раззагдæр проекты куыст. Сергей Меняйло æмæ Уæрæсейы хицауады сæрдары хæдивæг Александр Новак аргъ скодтой Цæгат Ирыстоны стендæн. Нæ республикæйы сæргълæууæг радзырдта Уæрæсейы вице-премьерæн хъæууон хæдзарад, промышленность æмæ туризмы сæйрагдæр проектты тыххæй, инвестортæн цы уавæртæ арæзт цæуы республикæйы. Сергей Меняйло бафиппайдта, Цæгат Ирыстон цæттæ кæй у, Ирыстоны инфраструктурæ сырæзыныл æмæ ног куысты бынæттæ саразыныл кæдон сахаддзысты, ахæм хъæппæристæм.
