Хъабанты Давидæн йæ куысты бон райдыйы 9 сахатыл. Æмæ йæм æрвылрайсом дæр пациæнттæ фенхъæлмæ кæсынц. Лæмбынæг сæм байхъусы, ратты хъæугæ амынддзинæдтæ. Стæй, æнæмæнг, бабæрæг кæны йæхи бон рынчындонмæ æрбацæуын кæмæн нæу, уыдоны. Боны дæргъы 10-15-æй къаддæр никуы вæййынц.
Адæмæн æххуыс кæнын Хъабанты Давидæн йæ сабибонтæй уыд йæ стырдæр бæллиц. “Мæхи æндæр дæсныйады никуы уыдтон”, — зæгъы æрыгон специалист. Скъолайы фæстæ æнæ дызæрдыгæй равзæрста Цæгат Ирыстоны паддзахадон медицинон академийы дзæбæхгæнæн факультет. Дыууæ азы дæргъы бакуыста Дзæуджыхъæуы, æвæстиаты æххуысы службæйы.
Афæдзы размæ Давид сфæнд кодта йæ райгуырæн сахары адæмæн æххуыс кæнын. Йæ куысты бынат Дигорамæ раивта. Ныридæгæн зæрдиагæй кусы районы рынчындоны. Йæ равзæрст фæндагыл фæсмон нæ кæны. Разы у йæ æмкусджытæй дæр.
Дыгуры районы рынчындоны ис 9 хайады. Кусынц æхсæвæй-бонæй. Курдиатджын специалисттæй цух не ‘ййафынц. Уыдон кæддæриддæр цæттæ сты адæмæн хъæугæ æххуыс бакæнынмæ.
Цалдæр азы дæргъы рынчындоны фæфылдæр и æрыгон специалистты нымæц. Уыдон сæ цард снывонд кодтой адæмæн æххуыс кæнынæн. Кæд дæсныйады рагæй не сты, уæддæр сæ фарсмæ ис фæлтæрджын специалисттæ. Иумæйаг тыхтæй архайынц æнæниздзинады сæраппонд.
