Кировы районы 27 мин адæймагæй фылдæр цæры. Раздæр сæ флюорографи кæнынмæ иннæ районтæм кæнæ Дзæуджыхъæумæ цæуын хъуыд. Ныр сæ цард фенцондæр. Районы рынчындоны фæзынд флюорограф. Абон сæм æй фæхæццæ кодтой. Ног медицинон кусæнгарз цы пайда у æмæ ма цавæр ивддзинæдтæ æрцыд районы рынчындоны, уый федта ме ‘мкусæг Биджелты Бертæ.
Мæрзойты Викæ скъола каст фæци æмæ цæуы дарддæр ахуыр кæнынмæ. Медицинон справкæ райсынæн æй, æнæмæнг, флюорографи скæнын хъæуы. Йæ мад Людæ цин кæны, иу гæххæтты тыххæй чызджы иннæ районтæм, кæнæ горæтмæ ласын кæй нæ бахъуыд, ууыл. Кировы районы центрон рынчындоны флюорограф кæй фæзынд, уыцы æхсызгон цау æрæджы базыдтой.
Ахæм нырыккон домæнтæн дзуапп дæттæг медицинон техникæ районы рынчындоны фæзынд нæ республикæйы æнæниздзинад хъахъхъæнынады министрад æмæ рынчындоны разамынды æмархайды руаджы. 5 азы Кировы районы цæрджытæ флюорографи кæнынмæ цыдысты Дзæуджыхъæумæ, Беслæнмæ кæнæ Æрыдонмæ.
Михаил Ратманов: «Амæй фæстæмæ нæ республикæйы стырдæр районтæй иуы цæрджыты нал хъæудзæн нæдæр Дзæуджыхъæумæ, нæдæр Беслæнмæ, нæдæр Æрыдонмæ цæуын. Флюорографи сын кæндзысты районы. Ног кусæнгарзы руаджы дохтыртæн ныр сæ бон уыдзæн диспансеризаци æнтыстджындæрæй кæнын.»
Рынчындоны æрмæст флюорограф нæ фæзынд, фæлæ ма ног лифт дæр. Уый дæр Цæгат Ирыстоны æнæниздзинад хъахъхъæнынады министрады æххуысæй.
Рынчындоны бæстыхайы 4 лифты дæр цалцæггæнинаг уыдысты. Ныр дзы операцитæгæнæн æмæ реанимацийы хайадмæ хæстæгдæр чи сты, уыдон ногтæй баивтой.
Кировы райлны рынчындоны цалцæггæнæн куыстæ цæудзысты дарддæр дæр. Ифтонг йæ кæндзысты ног нырыккон кусæнгæрзтæй. Иуæй-иу хайæдтæм 1982-æм азæй зылд нæ уыд. Уагдоны сæйраг дохтыры хæстæ рæстæгмæ æххæстгæнæг Моргъуаты Таймуразы ныхæстæм гæсгæ, рынчынты исæн хайад æмæ иннæ базилинаг агъуыстытæ ацы азы фæззæджы бындуронæй сцалцæг кæндзысты.
Биджелты Бертæ, Цорæты Чермен, Ирыстоны хабæрттæ
