Курорт «Мамысон»-ы тъунел байгом кæндзысты декабры. Уый тыххæй фехъусын кодтой радон аппаратон æмбырды. Объект цæттæ у эксплуатацимæ раттынæн. Уæ зæрдыл уын æрлæууын кæндзыстæм, тъунел аразын райдыдтой 2 азы размæ.
Ифтонггонд у зынгсирвæзты ныхмæ системæ, вентиляци, видеоцæстдард æмæ æндæр хъæугæ гæрзтæй. Уымæй уæлдай ма æмбырды фехъусын кодтой, иннæ аз республикæйы кæй сцалцæг кæндзысты 22 скъолайы. Афæдзы кæронмæ та байгом кæндзысты 5 ног рæвдауæндоны. Дыууæ – Дзæуджыхъæуы, иу – Хъызлары. Дыууæ та – Ногир æмæ Черменыхъæуы. Кадджын уавæры сæ байгом кæндзысты райсом. Æдæппæтæй ацы аз рагагъоммæйы ахуырадон уагдæтты бантыст 2 мин ног бынаты байгом кæнын. Премьер Дзанайты Барис бабар кодта районты байгом кæнын хойрæгты армукъатæ.
Æрныхас кодтой цæрæнуатон-коммуналон комплексы куыст. Профилон министр Таматы Майрæн фæнысан кодта, хъармгæнæн рæстæг кæй цæуы нысангонд фæткмæ гæсгæ. Социалон нысаниуæн кæмæн ис, ахæм объектты куыст бирæфатерон хæдзæрттæ ифтонг сты хъармæй. Уымæй уæлдай ма, министр фехъусын кодта аивгæнæн куыстыты тыххæй. 42 æхсæнадон бынаты æмæ 74 кæрты хæрзвадатгонд æрцæудзысты ацы аз. Ацы къабазы архайд цæудзæн фидæны аз дæр.