Ацы хъазты руаджы сывæллæттæ канд сæ уæнгтæ нæ аивазынц. Ам рæзы хъуыдыкæнынад дæр. Уыимæ, у мадæлон æвзагыл. Цымыдисаг æмæ æнцон хуызы ахуыр кæнынц буары хæйттæ иронау. Иу хаттæй иннæмæ сæ, кæй зæгъын æй хъæуы, хуыздæр бахъуыды кæнынц. Уæвгæ та, полилингвалон къорды сабитæн ис алыхуызон æрмæг. Ныр та сыл ноджы фылдæр бафтыд. Бакуыстой бæрнон специалисттæ, сты æмбырдгондты хуызы.
Аргъæуттæ, зарджытæ, кæфтытæ, уыци-уыцитæ, базон-базонтæ. Сывæллæтты рæвдауæндæтты полилингвалон къордтæн ахæм æмбырдгонд рацыд фыццаг хатт. Ныр хъомылгæнджыты нал хъæудзæн хи тыхтæй агурын æрмæг. Æппæт методикæ дæр уыдзæн иу чиныджы. Бакуыстой йыл ирон æвзаджы рæзты центры эксперттæ Моурауты Зæлинæ æмæ Бестауты Зæирæ. Ног федералон программæмæ гæсгæ, æрмæгæн йæ 20% хъуамæ уыдаит националон.
“Ирыстон — мæ райгуырæн бæстæ” арæзт у 2 хайæ. Фыццаджы ис тексттæ, дыккаджы — уæлæмхасæн хай, нотæтимæ. Куыстой йыл афæдзæй фылдæр. Йæ фæлгæты, сывæллæттæ канд рæвдауæндоны нæ дзурдзысты иронау хъазты хуызы. Хæслæвæрдтæ сын дæтдзысты хæдзармæ дæр. Цæмæй дзы сæ ныййарджытæ дæр архайой. Уый уæлдай ахъаз уыдзæн сабитæн, зæгъынц специалисттæ. Уымæн æмæ хъуамæ æнæмæнг иронау дзурой сæ бинонтимæ дæр.
Ныридæгæн методикон æрмæг ацыд экспертты æркаст, ныффидар æй кодта хицауад. Центры кусджытæ, автортæ ног ахуыры азы агъоммæ æмбæлынц рæвдауæндæтты хистæр хъомылгæнджытимæ, комкоммæ семæ ныхас кæнынц.
Специалисттæ уыдысты республикæйы районты фылдæр хайы, тагъд рæстæджы ма фембæлдзысты Мæздæджы педагогтимæ.
Цæгат Ирыстоны сывæллæтты рæвдауæндæтты полилингвалон къордтæ ног æрмæгмæ гæсгæ кусын райдайдзысты ног ахуыры аз. Æмткæй райсгæйæ, республикæйы ацы модель кусы 15 азæй фылдæр. Фыццаг æй æххæст кодтой фæлварæн хуызы. Æрмæст цалдæр рæвдауæндоны. Сæ куысты хатдзæгтæ дисы кæй æфтыдтой ныййарджыты, уый тыххæй къордтæ фылдæрæй фылдæр кодтой. Ацы аз сыл радон хатт бафтдзæн 3 рæвдауæндоны. Афтæ æдæппæтæй республикæйы ирон æвзаг, традицитæ æмæ культурæ бындуронæй кæм ахуыр кæнынц, ахæм рæвдауæндæттæ уыдзысты 118.
