Ацы хъæрмуаты мæр кæнæ торф не ссардзынæ — нæй дзы, уымæн æмæ тюльпантæ доны зайынц. Авд азы размæ дæр ма эксперименталон цы технологи уыд, уый абон хорз тыллæг хæссы.
Ам æнæнхъæлæджы ницы ‘рзайдзæн. Æрмæст, афон æмæ фæткмæ гæсгæ. Уæлдæфы температурæ, уымæлад æмæ таддаджы арæзт, суанг ма рухсы тынты здæхт дæр рагацау хыгъд вæййынц. Хъæрмуаты æхсæвæй-бонæй хъуамæ уыцы иу температурæ уа, уымæй зайæгойтæ рæзой — 14 градусы бæрц. Чысыл, зæгъгæ, фæтæвддæр, уæд сæ зæнгтæ даргъ æмæ лыстæг фестдзысты.
Бонмæ мингай дидинджытыл æрзилынц хъæрмуаты кусджытæ. Кæд фæкъæдз сты, уæд сæ раст кæнын фæхъæуы, цæмæй фыдуындæй ма баззайой рæгъæды афонмæ. Æппæтæй лæмæгъдæр бынат — дзæгæрæджы бын. Уым, зæгъгæ, слыстæг тюльпан, уæд, бæрæгбонмæ нал ахæсдзæн.
Дидинæг æртонын дæр афойнадыл хъæуы. Куы фæтагъд кæнай, уæд вазæйы нæ райхæлдзæн. Байрæджы кодтай, уæд та йæ зæнг æртасдзæн.
Дидинӕг æд хъӕдындз къоппы сӕвӕрынц хусæй. Афтæ, æмбӕлгӕ температурӕйы, тюльпантӕн сӕ бон у иу мӕйӕ фылдӕр фæлæууын. Бынӕттон продукци ӕрмӕст хӕрзхъӕддзинад æвдисæг нæу. Логистикӕ дæр ахсджиаг у — дард ӕй ласын нӕ хъӕуы. Æлхӕнӕгмӕ дæр бахауынц ӕппӕты ногдӕр уавæры.
Ацы сезоны ам ис 40 мин тюльпаны бӕрц. Дидинджытӕ зайынц раст рӕнхъытӕй. Урсытӕ, уардихуызтæ, сырхытӕ, сæ иуты кæрæттæ хӕрдгӕимæ сты, иннæтæн æнæ уымæй. Дӕс сортӕй фылдӕр. Ӕмӕ алчидӕр у бӕстон куысты фӕстиуӕг. Тагъд рæстæг апарахат уыдзысты Дзӕуджыхъӕуы ӕмӕ республикӕйы районты дидинджыты дуканитыл.
