Дзанайты Барис амыдта социалон-фӕллойадон ахастдзинӕдты къамисы

Цӕгат Ирыстоны сараздзысты ног ӕртӕфарсон бадзырд кусджыты бартӕ хъахъхъӕныны тыххӕй хӕстӕгдӕр 3 азмӕ. Ахӕм уынаффӕ рахастой республикон къамисы ӕмбырды Дзанайты Барисы разамындӕй. Ныртæккæйы документ йӕ тыхы уыдзӕн ацы азы кӕронмӕ, ног бадзырд у дыууæ мин дыууын æвдæм – дыууæ мин дыуын фарæстæм азтӕн. Хицауадæн сӕйрагдӕр у куыстæн æдас уавӕртӕ саразын ӕмӕ цӕрджытæн ӕххуыс кӕнын. Уӕлдай ӕргом — фӕсивӕды, хъыгдард æнæниздзинадимæ адӕмы ӕмӕ сӕрмагонд операцийы архайджыты куыстифтонгадмæ. Регионы фӕллойы паддзахадон инспекци фӕтыхджындӕр кӕндзӕн бизнесимӕ профилактикон куыст. Уымӕй уӕлдай, сфидар кӕндзысты ног программӕтӕ 50 азӕй уӕлӕмӕ кары кусджытӕн. Фӕлтӕрдджын специалистты ногӕй цæттæ кæндзысты, цæмæй сæм фæзына нымæцон арӕхстдзинӕдтӕ. Сæхæдæг та уыцы иу рæстæг се ‘рыгон ӕмкусджытӕн зондамонджытӕ суыдзысты. Ӕмбырды хицӕн темӕ — сæрмагонд операцийы ветеранты куыст ӕмӕ адаптаци. Зæгъм, сæ бон уыдзӕн лӕвар райсын дыккаг астӕуккаг профессионалон ахуырад бюджеты хардзӕй. Национ проект “Кадртӕ”-йы фӕлгӕты ногӕй ахуыр кӕнӕн ис дыууæ сæдæ æртындæс хъӕугӕ дӕсныйадыл.