Ирвæзынгæнджытæн – кад

Уæрæсейы ирвæзынгæнджытæ абон бæрæг кæнынц сæ профессионалон бæрæгбон. Ацы бон 27 азы размæ нæ бæстæйы сфидар кодтой ног структурæ. Уæдæй-абонмæ уæрæсейаг ирвæзынгæнджытæ сты, зын уавæры чи бахауд, уыцы адæмы фарсмæ.  Ныртæккæ Æнæнхъæлæджы уавæрты министрад у хъомысджын æмæ тагъдæххуысы уагдон. Йæ хайæдтæ ифтонг сты нырыккон техникæ æмæ кусæнгæрзтæй, ис сæм мобилон къордтæ дæр. Æцæг хъæздыг та сты адæмæй, сæ специалисттæй: тыхджын, фæразон, кæддæриддæр цæттæ цыфæнды уавæрты кусынмæ. Æрмæст ацы аз уæрæсейаг ирвæзынгæнджытæ алыхуызон æнæнхъæлæджы уавæрты операциты æмæ зынгсирвæзтыты архайгæйæ фервæзын кодтой 200 мин адæймаджы. Аиуварс кодтой 300 егъау æвирхъау хабары. Министрады психологты æххуыс та бахъуыд 1500 хатты.