Донгӕроны скъола æнусы ‘рдæг нӕ цалцӕг кодтой. Суанг дзы уæвын дæр тӕссаг сси. Фӕстаг 30 азы-иу ахуыссыд рухс, нæ куыстой хъармгæнæнтæ, канализаци. Скъоладзаутæ ӕмӕ ахуыргӕнджыты хъуыди ахӕм уӕззау уавӕрты архайын.
Раздӕр скъолайы кусджытӕ архайдтой коммуналон системӕтӕ сӕхӕдӕг цалцӕг кӕныныл, фӕлӕ уый фаг нӕ уыд. Ныр бæстыхай бынтондӕр сног кодтой. 4 мӕймӕ аразджытӕ баивтой зӕронд уӕлхӕдзар, сфидар кодтой хӕлд къултӕ, стӕй сӕвӕрдтой ног телтӕ ӕмӕ хӕтӕлтӕ. “Иугонд Уӕрӕсе”-йы минӕвӕрттӕ сбӕрӕг кодтой аразджыты куысты хӕрзхъӕддзинад ӕмӕ тагъдад.
Ныртӕккӕ цалцӕг, зӕгъӕн ис, ӕмӕ фӕци. Кусджытӕ ӕфснайынц арӕзтадон бырӕттӕ ӕмӕ кълӕстӕ цӕттӕ кӕнынц ахуыры азы райдианмæ. Скъолайы сӕвӕрдтой ног дуӕрттӕ ӕмӕ рудзгуытӕ. Кълӕсты дзаума дӕр иууылдӕр уыдзæн ног. Уымӕй уӕлдай, кабинетты фæзындзæн нырыккон ахуырадон ифтонггарз. Партийы минӕвӕрттӕ разыйӕ баззадысты. Ахуыргæнæндæтты арӕзтад ӕмӕ бындурон цалцӕг — партийы адæмон программӕйы сӕйрагдӕр хӕсты ‘хсæн.
Хъыгагӕн, ӕнӕхъӕн скъола нӕ сцалцӕг кодтой. Цæрджытæ ма уӕддӕр зӕрдӕ дарынц, ӕддаг къултӕ дӕр кӕй сног кӕндзысты, ууыл. Куыд рабӕрӕг, афтӕмӕй уыдон хаст не ‘рцыдысты куыстыты пъланмӕ.
Ацы скъолайы ахуыр кӕны 85 сывӕллоны. Цалцӕг кӕныны рӕстӕг уроктӕ цыдысты бынӕттон администрацийы агъуысты. Сентябры ӕрбаздӕхдзысты ноггонд нырыккон кълæстæм. Цӕгат Ирыстоны ахуыргæнæндæттæ цалцӕг кӕнынц национ проект “Фӕсивӕд ӕмӕ сывӕллӕттӕ”-йы фӕлгӕты.
