Андиаты Марат ныр 8 азы цӕры рыстытимæ. Ӕдзух тæрсы, уынджы куы ахауа, уымæй. Нӕлгоймаджы диагноз — сӕры магъзы каверномæ. Ирыстоны дохтыртӕ ӕххуыс кæнынц рынчынӕн. Уӕддӕр низ нӕ сысы. Сӕрыл вазыгджын операци хъӕуы. Сдзӕбӕх уӕвыны ныфс ын радта мӕскуыйаг нейрохирург.
Сӕрмагонд операцийы ветеран Сергей Авагимовӕн дӕр ацы мадзал у нывыл цардмӕ раздӕхыны фадат. Уӕззау цӕфы фӕстӕ Бетъырбухы дохтыртӕ фервӕзын кодтой ӕфсӕддоны. Уӕддӕр схъис бахъыгдардта нуар. Йæ рыстытæй йын хуыссæг дæр нал ис. Фонд “Фыдыбӕстӕ хъахъхъӕнджытӕ”-йы координатортӕ Сергейæн баххуыс кодтой хъӕугӕ дохтыр ссарынӕн.
Дзӕуджыхъӕуы 1-ӕм поликлиникӕйы — иумӕйаг ӕркаст. Ам кусынц травматолог, нейрохирург, тугдадзинты хирург, медицинон психолог ӕмӕ эндокринолог. Дохтыртӕ бӕстон кæсынц алы цаумæ дӕр. Уавӕр уæззау куы уа, уӕд медицинон кусджытӕ кабинетӕй комкоммӕ видеобастдзинад скæнынц Мӕскуыйы профессортимӕ. Рынчынтӕ тынг бирӕ сты. Федералон медикон-биологон агентады дохтырты ӕххуыс æхсызгонæй хъӕуы адӕмы.
Хатгай ӕххуыс фӕхъӕуы, йӕхӕдӕг цӕрӕнбонты адӕмы чи дзæбæх кодта, уыдоны дӕр. Марьям Дзариева 50 азы фӕкуыста лор-дохтырӕй. Йӕ бинонтыл ӕрцыд стыр маст — ӕвиппайды амард йӕ чызг. Сылгоймагыл стыхджын дыккаг хуызы диабет. Уыцы низ дзӕбӕх кӕны ныр дӕр. Бынӕттон тугдадзинты хирург Къӕбысты Вячеслав Марьямӕн бауынаффӕ кодта мӕскуыйаг профессормӕ æрбацӕуын.
Эндокринологы бирӕ пациенттæн хуымӕтӕг таблеткӕтӕ нал ӕххуыс кӕнынц. Скæндзысты сын лӕвар операцитӕ паддзахадон квотӕтӕм гæсгæ. Мӕскуыйы 85-ӕм клиникон рынчындоны дзӕбӕх кӕнынц ӕппӕты уӕззаудӕр цаутӕ. Специалисттӕ цӕттӕ сты адӕмы сæ центрмӕ райсынмӕ, цӕмӕй сӕ сдзӕбӕх кӕной тӕссаг низтӕй.
Мӕскуыйӕ специалисттӕ Цӕгат Ирыстонмӕ ӕрцыдысты ахсджиаг хӕсимӕ. Бынӕттон цӕрджытӕй бирӕтӕн уый у стӕм фадат зындгонд ахуыргӕндтӕ ӕмӕ профессортӕм лӕвар консультацимæ бахауынæн. Дохтыртӕ алы адӕймагмæ дæр æркæсынц лæмбынæг. Архайынц, ӕвӕстиатӕй вазыгджын операцитӕ кӕй хъӕуы, уыдоны се ‘ппӕты дӕр райсыныл.
Гæххæтытимæ уӕлдай архайд ӕмӕ бюрократи нæй. Рынчынты рады бирӕ лӕууын нæ хъӕуы. Мӕскуыйы клиникӕты дзӕбӕх кӕнынмæ кæй æрвитынц, уыцы адӕмы номхыгъдтӕ бынаты цæттæ кæнынц.
Дохтыртӕ ӕххуыс кӕнынц ӕгас республикӕйы цӕрджытӕн. Абон истой районты цæрджыты. Райсом — горæтæгты. Зӕрдӕ бавӕрдтой, цалынмӕ рады алы адӕймаг дӕр ӕххуыс райса, уӕдмӕ кабинетты дуӕрттӕ кӕй нӕ сӕхгӕндзысты, уымӕй.
