Сæрды цы мониторинг уыд, уый рæстæджы цалдæр аиппы рабæрæг. Зæгъæм, къахвæндæгты цæхгæрмæ цы донвæндæгтæ ис, уыдон æмбæрзт нæ уыдысты. Афтæ лифты цур асинтæ дæр. Уæдæ пандустæ дæр æгæр къул уыдысты. Эксперттæ куыд бафиппайдтой, афтæмæй аразджытæн сæ фылдæрмæ фиппаинæгтæ нал ис.
Бæрæггæнынады фыццаг объект — Магкæты Зурабы уынгыл ногарæзт хæдзар. Нырма эксплуатацийы лæвæрд нæу. Йе ‘нæниздзинад хъыгдард кæмæн у, уыцы адæймагæн дзы хъæугæ фадæттæ ис. Раздæр рабæрæггонд аиппытæ ныры онг иуварсгонд æрцыдысты.
Мамсыраты Хаджумары уынгыл ног цæрæн комплекс дæр федтой. Бацæуæн фæзуат домæнтæн дзуапп дæтты. Пъол арæзт у фæбырæн цæуыл нæй, ахæм æрмæгæй, фæлæ асинты уæлхъус сæрмагод хæцæнтæ нæй. Парламенты депутат Цæллагкаты Жаннæ йæхæдæг бафæлвæрдта æнæ æххуысæй бацæуын мидæмæ.
Аразджытæн хуызæджы хуызæн — Гагкайты Алиханы уынгыл бирæуæладзыгон хæдзар. Йе ‘нæниздзинадмæ гæсгæ йæ авналæнтæ цыбыр кæмæн сты, уыцы адæймагæн дзы алы уавæр дæр ис. Уæрæх бахизæнтæ дзы, лифтмæ та инвалидон коляскæйыл бацæуын æнцон у.
Сæ ‘нæниздзинад хъыгдард кæмæн у, уыцы цæрджыты æнцонвадат уавæрты цæрыны бартæм цæстдард хъæуы. Партийы уæнгты ныхасмæ гæсгæ, ацы хъуыддаг “Иугонд Уæрæсейы” адæмон программæйы ахсджиагдæр здæхтыты ‘хсæн ис.
