Фæзуатыл арæзтадон куыстытæ кæнæн кæй нæй, уый тыххæй документ радтой Кировы районы администрацийы. Уый та бынаты раивылдтытæй тæссаг кæй у, уый тыххæй. Бынæттон цæрджытæ йæ хорз зонынц, ам æрдздых йæхи куыд равдисы, уый. Иу æмæ дыууæ хатты йæ нæ федтой сæхи цæстæй.
Фæлæ хъæуы цæрджыты æрмæст раивылдтæй тас нæ тыхсын кæны. Кæд ам бинонтæн улæфæн базæ аразынц, уæд дзы хъæлæба дæр уыдзæн. Нæ сабыр цард ма мысдзыстæм, зæгъгæ, дзурынц адæм. Кæрдзыны æртæ мин адæймагæй къаддæр цæры æмæ ацы хъуыддагыл стæмтæ бацин кæндзысты.
Адæм арæзтады тыххæй куыддæр базыдтой, афтæ хъæуы хицау Андиаты Сосланмæ фæсидтысты. Ис сæм æрмæст иу фарста. Кæд бынат, æцæгæйдæр, тæссаг у, уæд дзы цæмæн бауагътой куыстытæ райдайын?
Зæххы хайы хицауимæ дæр фембæлдыстæм. Бинонты улæфæн базæ кæй аразы, уый æцæг у. Донуат уыдзæн аразгæ. Йæ документтæ иууылдæр, Джиоты Игоры ныхасмæ гæсгæ, сты нывыл.
Уый та ууыл дзурæг у, æмæ проект сæххæст кæндзысты. Улæфæн базæйæ уæлдай ма дзы бакæндзысты спортивон кæсагахсыны скъола сывæллæттæн. Арæзтадæн Кæрдзын цæмæн равзæрста, уый дæр нын загъта Джиоты Игорь. Йæ кæсагдарыны хæдзарад ардæм хæстæг у. Уырдыгæй-иу кæсаг базæйы донуатмæ æнцонтæй æрбафтдзæн. Доны был уыдзæн чысыл хæдзæрттæ. Ныссадздзысты дзы гагадыргътæ. Сыхæгты зæрдæхудты бацæуын зæххы хайы хицауы æппындæр нæ фæнды.
Цæрджытæм иу документтæ, амалхъом адæймагмæ — æндæртæ. Чи сæ у раст уымæй нæ фæндыд бафæрсын Кировы районы администрацийы сæргълæууæджы хæстæ æххæстгæнæг Елойты Алымбеджы, фæлæ нын йæ пресс-службæ цаллдæр хатты “нæ”-йæ дзуапп радта. Æрмæг суанг сæрды систам. Джиоты Игорь куыд зæгъы, афтæмæй цæрджытимæ конфликт нæй, кæрæдзи бамбæрстой. Социалон ахсджиаг объекты арæзтад дарддæр цæуы.
