Сывæллæтты рæвдауæндæттæ нæ республикæйы фылдæрæй фылдæр кæнынц. Федтат æй уæхæдæг дæр. Ныридæгæн байгом кодтой 4 ног рæвдауæндоны. Иу – Алагиры, иннæ Советы хъæуы, 2 та Беслæны. Ифтонг сты æппæт æмбæлгæ кусæнгæрзтæй. Алы ран дæр 100 бынтæй фылдæр. Фæлæ ацы фарстайы иу хъуыддаг уæддæр нæ ивы. Бынæттæ фаг кæй нæй, уый дызæрдыггаг нæу. Кæд ныййарджытæ сывæллæтты сæ райгуырдæй фæстæмæ рады сæвæрынц, уæддæр бирæ хатт саби рæвдауæндоны къæсæрæй кæсгæ дæр нæ бакæны. Ныййарджыты бахъæуы хæдзары бадын, сæ бон куыстмæ рацæуын дæр нæу. Уæдæ сабитæ дæр скъолайы агъоммæйы ахуыртæ дæр нæ райсынц.
Уый хыгъд, хи рæвдауæндоны хъомылгæнджыты куыстæй бирæтæ разы сты, сæ зæрдæмæ цæуы сывæллæттæм сæ хъус куыд дарынц æмæ сын ахуыртæ куыд аразынц, уымæй. Фæлæ ныййарджыты хъуыдымæ гæсгæ, æмткæй та кæд уавæр аивыныл куыст цæуы, уыддæр нырма бæллиццаг нæу. Мадæлты сæ сывæллоны цы рæвдауæндонмæ радтын фæнды, уыдонмæ арæх дард цæуын фæхъæуы. Хæстæг чи сты – уыдон та дзаг сты, кæнæ та куыд кусынц, уый сæ зæрдæмæ нæ цæуы. Специалистты ныхæстæм гæсгæ, кæд ныййарджытæн сæ ныфс нæ сæтты, уæд сæ рады рагагъоммæ слæууын хъæуы. Сывæллоныл 4 мæйы куы цæуа, уæд. Уый тыххæй та паддзахадон лæггæдты сайты, кæнæ та бирæвæрсыгон центртæй иуы хъæуы курдиат ныффыссын.
