Коцты Владимир цæуы кикбоксингмæ, ноджы ма бирӕ уарзы физикӕ ӕмӕ хими. Лӕппуйы ницы хъыгдары наукӕ ӕмӕ спорты бӕрзӕндтӕм схизын. Бонæй бонмæ тынгдӕр разӕнгард кӕны. Æрӕджы Вовӕ сарӕзта, уӕззау тренировкӕты фӕстӕ хъарутӕ сног кӕнынӕн чи ӕххуыс кӕны, ахӕм батончикы рецепт.
Батончикы рецепт — иу айчы урс, банан, 150 граммы 5-процентон къæдор, грекъаг йогурт, мыд, арахисы пастæ ӕмӕ ма, Вовӕ цы дыууӕ компоненты нæ хъæр кæны, уыдон. Проект райста призон бынат ӕрвылазон конференци “Курчатовы кълӕстӕ”-йы. Скъоладзауæн йæ наукон разамонӕг Ӕмбалты Маринӕ ӕххуыс кодта алы здæхты дӕр. Зæгъы, йæхицæн дæр уый пайдайаг ӕмӕ цымыдисаг фӕлтӕрддзинад уыд.
Конференцийы ахуыргондты сконд дзӕвгар ӕрыгондӕр фӕци. Призон бынат ма бацахста Эвелина Манукян. Уый дӕр Курчатовы къласы архайы. Ацы аз сфӕнд кодта хими ӕмӕ физикӕйы рӕзын. Йӕ проект хуыйны “Хъӕбӕр æмтаддæгты техногенон фӕлхӕрттыл бакуыст”. Ацы здӕхт абон актуалон у, зæгъы Эвелина.
Проектмӕ бавнӕлдта фарон сентябры. Зын хӕс сӕххӕст кӕнынӕн ын баххуыс кодта наукон разамонӕг, 44-æм скъолайы физикӕйы ахуыргӕнӕг Елена Кузьменко. Эксперименттӕ арæзтой Хæххон-металлургон институты. Райстой-иу зӕронд кусӕнгӕрзтӕ ӕмӕ сӕ электролизы фӕрцы хицӕн згъӕртыл дих кодтой. Вакуммы пецы фӕстӕ та-иу сæ рауад вольфрамы карбиды ссад. Уымæй аразынц паддзахадон номенклатурӕйы дзауматӕ.
Уый аккаг бындур у наукӕйы дарддӕры къахдзӕфтӕн, зӕгъынц ахуыргӕнджытӕ. Ахсджиаг ӕххуыс бакодтой центр “Вершина” ӕмӕ Хæххон-металлургон институт. Ныртӕккӕ фæсивæдæн ис иттӕг хорз фадат иртасӕн куысты рӕзынӕн, кӕй зӕгъын ӕй хъӕуы, сӕ ахуыргӕнджыты разамындӕй.
