Холладжы хæрзхъæддзинадæн ис æхсæз бæрæггæнæны: протеин, сой, фосфор, клетчатка, уымæлад æмæ фæнычы бæрц. Иууылдæр нысангонд сты паддзахадон стандартты. Нормæтӕм гӕсгӕ буаргъӕдты бӕрц сбæлвырд кæнынц лабораторийы. Ам продукцимæ цæстдард ис алы къæпхæны дæр. Ацы швейцараг анализаторы фæрцы та бæрæггæнæнтæм æнхъæлмæ кæсын бирæ нæ бахъæуы.
Цы бæрæггæнæн нæ фæфæнды базонын, уымæн йæ бæрц ацы мигæнæны руаджы 6 секундмæ сбæрæг кæнæм. Химион мадзæлттæй пайдагæнгæйæ та нæ, зæгъæм, сойы бæрц базонынæн бахъæудзæн 3 суткæйы, урсаг æмæ фæнычы бæрц базонынӕн та химион анализ иу бон бахъӕуы.
Ацы кубы мидæг ис холлаг. Ифтонггарз ахæм хуызы бæрæг кæны, гранулæтæ куыд мур кæнынц, уый. Продукци анализ ацæуы бон цалдæр хатты. Тестытæ дæр ын кæнынц цалдæр ифтонггарзы æххуысæй. Лабораторийы ис микробиологийы хайад. Цæттæ продукцийы æдасдзинад бæрæг кæны специалист.
Холлаг, фыццаджыдæр, хъуамæ уа цилиндрон хуызы рæсугъд гранулæтæй, сæ диаметр æмæ дæргъ — æмхуызон. Стæй, кæй зæгъын æй хъæуы, сæ хæрзхъддзинад паддзахадон стандарты домæнтæн дзуапп дæтта. Уый тыххæй кондады рæстæг басгæрст саразæм алы 2 сахаты фæстæ дæр.
Заводы зæрдæ хонынц аппаратон агъуыст. Ацы монитортыл куыстуат фенæн ис æнæхъæнæй. Алы архайдмæ цыфæнды къæпхæныл дæр ам цæст дарыны фадат ис. Ардыгæй скусын æмæ ахуыссын кæнæн ис гæрзтæ.
Ардыгæй фæтк дæттæм æгас заводæн дæр -— элеваторæй райдай æмæ цæттæ продукцийæ фæу. Кондады æппæт къæпхæнтæм дæр цæст дарæм. Хъуамæ иу къуылымпыдзинад дæр ма сæвзæра, аиуварс æй кæнæм рагагъоммæ.
Завод, зæгъæн ис, æмæ дихгонд у дыууæ хайыл: иуы уадзынц холлаг кæсæгтæн, иннæйы — фосæн. Кæрæдзимæ ницы бар дарынц. Уæдæ сæ технологитæ дæр — алыхуызон. Гранулæтæ кæнæн гарзы хъомыс у — 15 тоннæйы сахатмæ. Кæсæгты корм аразы экструдер. Сахатмæ рауадзы 10 тоннæйы. Йæ фæрцы хомаджы муртæй рауайы алыхуызон ас æмæ формæйы гранулæтæ, цы кæсагæн æй дæтдзысты, уымæ гæсгæ.
Завод скуыста ацы аз апрелы. Сæрды ацыдысты аттестаци æмæ сæ бахастой экспортгæнæг куыстуæтты хыгъдмæ. Ныр сын продукци ласыны фадат ис Абхази, Гуырдзыстон, Узбекистан æмæ илциисæн иугонды бæстæтæм. Хъæууон хæдзарадмæ цæстдарды управленийы кусджытæ сарæзтой ветеринарон-санитарон иртæстытæ. Сбæрæг кодтой, бæстæты домæнтæн кондад, æвæрдад æмæ уæйкæнынады æууæлтæм гæсгæ дзуапп дæтты æви нæ.
Куыстуатæн аттестаци ис æмæ 25-æм августы бæрнон кусджытæ иртæстытæ скодтой холладжы фыццаг партийæн. Бацæттæ йæ кодтой Абхазимæ арвитынæн. Ветеринарон документты бындурыл системæ “Меркурий”-мæ хаст æрцыд ветеринарон сертификат балергæсаджы холладжы 20 тоннæйы экспортæн.
Цалдæр мæймæ заводæн фæзынд заказгæнджыты егъау номхыгъд. Географи уæрæх у: Карели, Мурманск, Санкт-Петербург, Ростов, Краснодар, æмæ æрмæст уыдон нæ. Ам продукци уадзæн ис суанг сæрмагонд рецепттæм гæсгæ дæр. Заводæн йæ бон кусын у æртæ сменæйæ, фæлæ дзы ныртæккӕ ис дыууæ. Æппæты фылдæр хъомыс — афæдзмæ 219 000 тоннæйы. Фæнд кæнынц ног кондадон фæзуат байгом кæнын.
Нæ территори тынг стыр у, райрæзты фæндӕ дæр нæм тынг бирæ ис. Фыццаградон хæс у — хæдзарон фосæн холладжы кондад фæфылдæр кæнын. Ныртæккæ æвзарæм куыйтæ æмæ гæдытæн холлаггæнæн аппарат.
Ног ифтонггæрзтæ балхæныны фæдыл бадзырд ныридæгæн бафыстой. Йæ хъомыс уыдзæн 10 тоннæйы сахатмæ. Мигæнæнтæ æрбаласдзысты афæдзы кæрон. Иннæ азы райдиан та сæ æвæрын райдайдзысты. Хъуамæ уалдзæджы скусой. Сæйраг нысан — импорт раивд æмæ бæстæйы хæлцадон æдасдзинад. Холладжы заводтæ Уæрæсейы ис, фæлæ ахæм хъомысимæ — æрмæст Цæгат Ирыстоны. Ам продукци европæйаг стандарттæн дæр дзуапп дæтты.
