Зæрдæмæдзæугæ архайд ссарын Михайловскæйы училищæйы студенттæн æххуыс кæнынц сæ педагогтæ. Лæппутæ архайынц уæззау атлетикæйæ æмæ ныридæгæн æвдисынц бæрзонд цæттæдзинад. Республикон ерысты райстой фыццаг бынæттæ. Уæлæмхасæн архайды руаджы та хуыздæр кæны сæ ахуыр дæр.
14-аздзыд Омар Тагиев йæ фыццаг ерысты хорз бæрæггæнæнтæ кæй равдисдзæн, ууыл дызæрдыг дæр нæ кодта. Уымæн æмæ йæхи бæстонæй æрвылбон дæр цæттæ кодта. Фæндыд æй сызгъæрин майдан рамбулын. Михайловскæйы сæрмагонд училищæйы спортивон залы йын вæййы тренировкæтæ. Йæ размæ æвæрд хæс æххæс кодта къæпхæнгай, афтæмæй райста фыццаг бынат республикон турниры уæззау атлетикæйæ.
Джиоты Алыксандр та ерысты райста дыккаг бынат. Фæлæ уый дæр хорз бæрæггæнæн у, зæгъы лæппу. Йæ рæдыдтытæ хынцгæйæ, ныр дарддæр архайдзæн йæхиуыл. Уæззау атлетикæмæ цæуы æрмæст афæдзы рдæг. Хъуыды дæр нæ кодта, ацы спорт йæ царды сæйраг бынат кæй бацахсдзæн. Ныртæккæ Алыксандр йæхи цæттæ кæны Цæгат Кавказы федералон зылды ерыстæм.
Михайолвскæйы училищæйы спортивон залы фæзуат чысыл у, стæй дзы спортивон кусæнгæрзтæ дæр бирæ нæй. Фæлæ ахæм уавæрты дæр фæсивæд схизынц бæрзонд къæпхæнтæм. Педагогтæ куыд зæгъынц, афтæмæй ахсджиаг у студентты сразæнгард кæнын, ахуырадон программæйæ уæлдæй, æндæр архайдмæ дæр. Æмæ уæд, зæрдæ дарæн ис, спорт сæ царды ахсджиаг бынат кæй бацахсдзæн, ууыл.
20 азæй фылдæр ам ис уæззау атлетикæйы уæлæмхасæн къорд. Пауæрлифтингæй чи архайдта, ахæм рауагъдонтæ дæр нæм бирæ ис, ныр дæр кæнынц тренировкæтæ, бирæтæ та ныридæгæн систы тренертæ.
Михайловскæйы сæрмагонд профессионалон училищæйы ис 45 ахуырдзауы. Алы сабийы дæр хъæуы бамбарын, йæ зæрдæмæ йын фæндаг ссарын, уый та æнцон хъуыддаг нæу, зæгъынц педагогтæ. Училищæйы архайд хуымæтæг нæу, алы сывæллоны хъомылады дæр ис цавæрдæр лыггæнинаг фарстатæ. Хъæуы сæ хистæрты æххуыс, цæмæй сæ фарсмæ балæууой æмæ сыл, сæ уавæр хынцгæйæ, узæлой. Ног архайд та, ома уæззау атлетикæ, æххуыс у сæ царды нысан баивынæн. Æмæ ахсджиаг нæу, спорт у, кæнæ æндæр ирхæфсæн пайда мадзал.
Æппæтуæрæсеон конкурсты нæ хъомылгæнинæгтæ райсынц раззагдæр бынæттæ. Мæнæ нывæцæнты республикон конкурс “Щит победы”-йы дæр нæ фæсивæд райстой хорз бæрæггæнæнтæ, систы призертæ. Архайæм сæ алывæрсыг райрæзтыл.
Ахæм ирхæфсæн архайд ахъаз у фæсивæдæн. Сæ уæгъд рæстææг пайда куыстæй баххæст кæнынц — уый та сæйрагдæр хъуыддаг. Сæхи фæлварынц царды алы къабæзты æмæ ссарынц зæрдæмæдзæугæ.
