Нæртоны ног скульптурæтæ

Сæ бынæтты сæ 4 боны размæ райдыдтой фидар кæнын, куыстытæ та фæуыдзысты ног къуырийы кæронмæ. Æдæппæтæй «Нæртон»-ы уыдзæн 17 скульптурæйы, конд сты бетон æмæ æфсæйнагæй. Сæ уæз хæццæ кæны 3 тоннæмæ. Сæ автор та у Ходы Николай. Куыд зæгъы, афтæмæй сыл 4 азы фæкуыста. Сæ саразыны хъуыды йæм, æрыгон лæппу ма куы уыд, уæд фæзынд. Ныр йæ рагон бæллиц къухы æфты. Йæ цинæн кæрон нал ис æмæ йæ æмбæхсгæ дæр нæ кæны. Нарты кадджыты нымайы ирон адæмон æмæ æппæтадæмон сфæлдыстады хæзнайыл. Зæгъын хъæуы уый, æмæ фыццаг 8 фæлгонцы Дзæуджыхъæуы 3 азы размæ сфидар кодтой. Уæдæй фæстæмæ ма Ходы Николай бацæттæ кодта 9 скульптурæйы. Автор куыд зæгъы, афтæмæй ма сыл бафтдзæн. Уæдмæ та уал Нарты Кадджыты хъайтартæ адæмæн систы уарзон, сæ алыварс фæзуат та – зæрдæмæдзæугæ фæлладуадзæн бынат. Ис ма иу фиппаинаг – скупьптурæты руаджы адæм зонгæ кæнынц ирон эпосимæ, бирæтæ ма кадджытæ ногæй бакастысты.