Нырыккон бынат æмæ æнæвнæлд æрдз. Рæсугъд, уыимæ ма æнцонвадат фæзуат ссарын æнцон нæу. Йæ саразын уыд проекты сæйраг нысан. Специалисттæ объекттæ Нары хæххон ландшафтимæ сбастой. Аив æрдзнывтæй æхцондзинад исын нæ хъыгдары туристон центр дæр. Ныртæккæ æххæстæй цæттæ у. Хæстæгдæр рæстæг ардыгæй экскурсийы ацæуæн уыдзæн Цæгат Ирыстоны зындгонд бынæттæм. Суанг ма культурон мадзæлттæ дæр араздзысты. Афтæмæй, бæхты театр “Нарты”-йы равдыстытæ фенæн уыдзæн хæхты хъæбысы. Уый тыххæй дзы сарæзтой аренæ æртæ сæдæ бынатимæ. Фæзынд ма дзы фæлладуадзæн зонæ. Бадæн бынæттимæ, урнæтимæ, рухсдæттæн системæ æмæ видеоцæстдардимæ. Сæ фарсмæ чысыл хæрæндæттæ. Хетæгкаты Къостайы райгуырæн хъæу æмæ йæ номыл музей алкæддæр цымыдисаг уыд республикæйы цæрджытæн æмæ уазджытæн.
Кæд бынат нырыккон рауад, уæддæр ын историон хуыз бахъахъхъæнын бантыст.
Ныридæгæн æппæт куыстытæ кæронмæ фæхæццæ кæнынц. Хъæуы ма коммуникацитæ эксплуатацимæ раттын. Комплекс арæзтой афæдзы дæргъы. Гыццыл рæстæг нæ бахъуыд проект саразынæн дæр. Алы къæпхæны бæрнондзинад дæр специалисттæ æмбæрстой. Уымæ гæсгæ йæм йе снысан кæныны размæ цалдæр хатты ивддзинæдтæ бахастой.
Куыстытæ баххæст кодтой хуыздæр проектты æппæтуæрæсеон конкурс “Горæты æнцонвадат уавæртæ саразыны” уæлахизы фæрцы. Уæд рамбылдтой “Историческое поселение” номинацийы. Йæ райрæзтæн радих кодтой 64 милуан сомы. Сæ фæллад суадзын æмæ дзы рæстæг æхсызгонæй арвитын ныридæгæн сæ бон у республикæйы цæрджытæ æмæ уазджытæн.
