Прививкæ царды хос æви тæссаг у æнæниздзинадæн? Ацы фарстайыл алы ныййарæг дæр ахъуыды кæны. Тæрсынц исты уæззау фæстиуджытæм куы расайа, уымæй. Уый тыххæй сæ сывæллæттæн вакцинаци кæнын фылдæр хатт разы нæ вæййынц. Æмбарын та йæ кæнынц афтæ: сабитæ прививкæты фæстæ уæддæр рынчын кæнынц. Фæлæ дохтыртæ сидынц адæммæ æмæ сын æмбарын кæнынц: вакцинæйы фæстæ буарыл хъуамæ фæзына, стæй йæ фæстæ фыццаг рæстæг рынчныдæр фæкæнынц. Æнæ уымæй нæ вæййы, фæлæ æппæт прививкæтæ дæр, æнæмæнг, кæнын хъæуы.
Елена Парфелева дыууæ сывæллоны мад у. Йæ цотæн прививкæтæ не скодта. Уый размæ тынг бирæ сæрмагонд литературæ бакаст, интернеты дæр агуырдта ацы фарстайы тыххæй информаци. Ныр йæ кæстæртæн прививкæтæ кæй нæ кæны, уый тыххæй йæ къух бафыста сæрмагонд гæххæттыл. Æрыгон мады уырны, сывæллоны укол кæнынмæ хæссыны размæ уал фарстамæ бæстон æркæсын фæхъæуы.
«Мæ хистæр фыртыл 6 азы æмæ æрдæг цæуы, кæстæрыл та — 4 азы. Прививкæты ныхмæ æз цалдæр аххосаджы тыххæй дæн. Мæ хистæр лæппуйæн ме ‘ррайæ скодтон БЦЖ, æмæ йын уый фæстæ хуыдыггæнæн низы, ома, астмæйы, уæззау фæстиуджытæм расайдта. О, уый кодтам. Фæлæ уæдæй фæстæмæ, та лæмбынæгдæр кæсын райдыдтон ацы фарстамæ æмæ бамбæрстон, прививкæтæ иммунитет æрмæст рæстæгмæ фæфидар кæнынц», — Елена Перфелева.
Прививкæты ныхмæ цы ныййарджытæ сты, уыдон гыццыл не сты. Фæлæ дохтыртæ семæ æмæ сæ хъуыдытимæ разы не сты. Куыд зæгъынц, афтæмæй бирæ низтæй хи бахъахъхъæнын æрмæстдæр профилактикæйы руаджы ис. Вакцинаци у адæймагæн йæ иммунитет фæфидардæр кæныныæн æххуыс. Уæззау хæцгæ низтæй хостæ нæй, æмæ фæстиуджытимæ тох кæныны бæстæ, хи рагацау бахъахъхъæнын æнцондæр у. Вакцинæ вирус иу адæймагæй иннæмæ нæ уадзы. Прививкæ скæныны размæ дохтыр сывæллæттæм лæмбынæг æркæсы. Дарддæр температурæ æмæ буары цъары сырх хуыз та сты организмы дзуапп, зæгъынц педиатртæ.
«Æнæмæнг æмбарын хъæуы уый, æмæ куыд цыфæнды хосы, афтæ вакцинæты фæстæ дæр гæнæн ис æмæ исты фæстиуджытæ уа: температурæ фæбæрзонддæр вæййы, сывæллонмæ хæрын нал фæцæуы, хъынцъым фæкæны. Инъекцийы бынаты та, гæнæн ис æмæ буар ссырх уа кæнæ фæхъæбæр уа», — фыццаг поликлиникæйы педиатр Тауытты Ларисæ.
Æнæниздзинад хъахъхъæнынады министрады æмбарын кæнынц — хæцгæ низтæй хи бахъахъхъæныны фæтк нæ бæстæйы у хорз арæзт у. Профилактикон прививкæ бирæ адæм кæнынц. Рæстæмбис нымадæй цæрджыты 90% скæнынц æппæт хъæугæ прививкæтæ дæр. Уый инфекцитæн рапарахат кæныны фадат нæ дæтты.
«Ныртæккæйы царды адæм арæх цæуынц иу бæстæйæ иннæмæ, æмæ афтæ хъуыды кæнæн нæй, æз æдас регионы цæрын, æмæ мыл ницы низ бахæцдзæн, зæгъгæ», — РЦИ-Аланийы æнæниздзинадхъахъхъæнынады сæйраг эпидемиолог Бутаты Марат.
Вакцинæтæ нæ регионмæ æрбаласынц Æнæниздзинад хъахъхъæнынады министрады курдиатмæ гæсгæ. Прививкæтæ скæнæн вæййы адæймаг кæм цæры, уыцы районы дзæбæхгæнæндоны. Уыимæ ныййарджытæ кæд сæ къухфыст æрæвæрдтой вакцинаци скæнынæн бардæттæг гæххæттыты, уæддæр сæ бон у сæ хъуыды аивын. Сывæллæттæн та скæнæн ис хуыфæг, джихниз, фадынæг æмæ æндæр низты ныхмæ вакцинæтæ.
Биджелты Бертæ
