Сывæллæттæ лæмбынæг кæсынц ахуыргæнæджы алы фезмæлдмæ дæр. Хырхфадæныл кусгæйæ хъæуы лæмбынæг æмæ рæстдзæвин уæвын. Æстæм къласы ахуырдзауты зонгæ кæнынц хъæдæрмæгимæ архайыныл. Фыццаг уал теори, уый фæстæ сæ зонындзинæдтæ ныффидар кæнынц практикæйы хуызы. Технологийы урок вæййы къуыри иу хатт. Миндзайты Марат æм тынг æхсызгонæй фенхъæлмæ кæсы. Йе ‘мгæрттимæ ныридæгæн сарæзтой бандон.
Æхсæзæм къласæй чызджытæ та технологийы урокы цæттæ кæнынц Ног азмæ. Гæххæттæй кæнынц гирляндæтæ, миттъыфылтæ. Уымæй уæлдай ма бæрæгбоны концертмæ хуыйынц националон уæлæдарæс Кæркуысты Вероникæ йæ æмкъласонтимæ саив кодта худ, хъæуы ма йыл хыз ныффидар кæнын, уымæй уæлдай ма цæттæ кæнынц Ног азы хъазæнтæ.
Чызджытæ ма сæхæдæг сæрмагонд æфсæддон операцийы бынатмæ арвитынмæ хуыйынц сусæггæнæн хызтæ. Ног азæй скъолайы фæзындзæн “Домоводство” предмет. Кабинет сифтонг кæндзысты æппæт хъæугæ дзауматæй.
Ног ахуырадон азы фæллойы уроктæ æнæмæнг уыдзысты алы скъолайы. Уый тыххæй æрæджы сæрмагонд Указ бафыста президент Владимир Путин. Бахæсдзысты сæ райдиан æмæ астæуккаг кълæсты программæмæ.
