Телеканал «Осетия-Ирыстон» цæттæ кæны ног сезонмæ. Эфиры фенæн уыдзæн 20 ног проектæй фылдæр. Алыхуызон темæтæ, ахсджиаг уазджытæ, цымыдисаг амæндтæ. Комкоммæ эфиры фембæлдыдтæ. Амалхъомдзинад, медицинæ, культурæ æмæ спорты къабæзтæ. Алы проект дæр йæхи кæсæджы кæй ссардзын, ууыл дызæрдыг нæ кæнынц не`кусджытæ.
Редакциты куыст æхсиды, уацхæсджытæ рады лæууынц сæ æрмæджытæ саразынмæ. Сæйраг хæс – зæрдæ барухс кæнын æмæ телевизормæ кæсджыты дисы бафтауын. Канд прораммæтæ ивд не рцæудзысты, аивдзæн эфирмæ цæуыны рæстæг дæр. Адæм кæй бауарзтой уыцы программæ «Канарейки» ныр æвдисдзысты райсомæй. Аивта йæ формат, цæудзæн къуыри дыууæ хатты уырыссаг æвзагыл, дыууæ хатты та ирон æвзагыл, хуындзæн «Сæумæ райсом».
Фыццаг бонæй фæстæмæ эфиры ис программæ «Добрый вечер, Осетия». Ныр æй баивдзæн ног –«Вечерняя смена». Алы изæр амонджытæ сæ уазджытимæ æрныхас кæндзысты царды ахадгæ фарстатыл. Ирон æвзагыл программæ хуындзæн Изарыгон рад. Уæвгæ ирон æвзагыл программæтæ ног сезоны уыдзæн фылдæр. Телеуынынадмæ кæсджыты размæ канал рахæсдзæн 20 ног проекты. Уыимæ дыгурон диалектыл дæр.
Контент фылдæр кæны, йæ хæрзхъæддзинад та хуыздæр. Уарзон передачатæм «Вокзал для двоих», «Ирон нива» æмæ «Хочу в Аланию» бафтдзæн ног тревел прогаммæ «Путешествие с Тинатин». Нæ уацхæссæг уæ базонгæ кæндзæн сыхаг республикæты цард æмæ культурæимæ. Проекты сæйраг хъуыды Кавказы тыххæй цы стереотиптæ ис уыдон фехалын. Равдисын, хæлæрттæ дунейы алы ран дæр ссарæн кæй ис, уый.
Иу ног проект ма «Дело мастера». Уым радзурдзыстæм кусгæ професситы тыххæй. Растдæр зæгъгæйæ та сыл цы адæм хæст сты уыдоны тыххæй. Инженертæ, зоотехниктæ, аграномтæ – нæ республикæйы райрæзтмæ стыр æвæрæн чи хæссы, уыдоны тыххæй хъуамæ зоной се`ппæт дæр.
Ногдзинæдтæм Национ телеуынынад цæуы фидар къахдзæфтæй. Алкæмæн дæр фадат уыдзæн ног прогаммæтæн аргъ скæнын. Ныридæгæн эфиры рацыд программæ «Улица». Цæттæ кæнынц сæрмагонд равдыстытæ Уæлахизы юбилеймæ дæр. Æрвылмæй нæ эфиры уазджытæ æмæ сюжеттæ æфсæддон темæйыл. Медицинæ, амалхъомад, хæринагкæнынад æмæ æндæр къабæзтимæ баст проекттæ. Информацион программæ Хабарттæ дæр ныр цæудзысты ног хуызы. Телеканал «Осетия –Ирыстон», къуыри авд боны, æрвылбон кусы цæмæй национ телеуынынад уа зæрдæмæдзæугæ.
