Максим Оросановæн æхсызгон вæййы ног æмбæлттимæ зонгæ кæнын. Хæларзæрдæ æмæ хъæлдзæг сывæллон, ахæмæй йæ зонынц кусджытæ дæр. Лæппуйæн уыд цалдæр операцийы. Фæлæ уæддæр архайдта æнцæйттимæ цæуын. Къахыл слæууын у йæ сæйраг бæллиц. Ныртæккæ Максим ахуыр кæны фæсаууонмæ, хæдзары уæвгæйæ. Æнцон ын нæу, фæлæ йæ зæрдæмæ тынг цæуы.
Руслан та центр “Ир”-ы йе ‘нæниздзинад хъæддых кæны 10 азæй фылдæр. Фыццаг пациенттæй иу у. Ныридæгæн цæуы дзæбæхгæнæн физкультурæмæ, физиотерапи æмæ психологтæм. Уарзы бæхтимæ тезгъо кæнын. Уæвгæ, уыцы процедурæ адæймаджы миддуне кæны сабыр, хорзы ‘рдæм ыл ахады. Лæппу ахуыр кæны Мæскуыйы IT-технологиты академийы филиалы дыккæгæм курсы. Кусы алыхуызон системæтæ æмæ программæтимæ. Ныридæгæн йæ реабилитаци кæронмæ æрхæццæ кæны. Йæхæдæг куыд зæгъы, афтæмæй ацы бынат тынг бауарзта, мысдзæн кусджытæ æмæ йæ хæлæртты.
Центр ифтонггæрзтæй æххæст у. Бынаты æххуыс кæнынц уæззау пациенттæн дæр. Специалисттæ æппынæдзух ахуыр кæнынц реабилитацийы ног методикæтæ. Дзæбæхгæнæн куыстуаты бындурыл республикæйы, Цæгат Кавказы федералон зылды дохтыртæн саразынц алыхуызон лекцитæ, дæсныйадæвдисæг ахуыртæ. Уый тыххæй сæм ис æппæт фæрæзтæ дæр. Уымæй уæлдай иппотерапийæн бæхдон, манеж, бассейн, хъазæн фæзтæ æмæ территоритæ, се ‘ппæт дæр сты хъыгдард æнæниздзинадимæ пациенттæн. Фæлтæр æрæджы райдыдта, сывæллæттæм ис бæстон æркаст. Семæ архайынц цалдæр специалисты. Уыдон сцæттæ кæнынц сæрмагонд картæ.
10 азы размæ центр байгом кодта Петербургы хицауады сæрдар Валентина Матвиенко. Центры юбилеймæ куыстуат æмæ специалистты схорзæх кодта бузныджы фыстæгæй. Уый кусджытæн у тынг ахсджиаг. Сæ сæйраг нысан дарддæр æххæст кæнынц – церебралон паралич кæмæ ис, уыцы сывæллæттæн æххуыс кæнын.
Æрвылаз комплексон реабилитаци цæуынц мингай сывæллоны. Ам кæддæриддæр цæттæ сты алкæй фарсмæ балæууынмæ æмæ бахуысс кæнынмæ.
