Скъолатæ электронон боныгмæ уый тыххæй рахызтысты, цæмæй ахуыры цыдмæ цæст дарæн уа тæккæ бæрæг ран — интернеты. Бамбæхсæн дзы ницæмæн ис, æппæт дæр у, куыд армытъæпæныл: скъоладзау цы темæ цæуы ныртæккæ, цавæр бæрæггæнæн райста æмæ хæдзары кæцы хæслæвæрдтæ хъуамæ сæххæст кæна.
“Дневник.ру”-йы ис социалон хызæгты гæнæнтæ дæр. Ныййарджытæ, скъоладзаутæ æмæ ахуыргæнджытæн дзы сæ бон у кæрæдзимæ фыссын. Суанг ма бæрæггæнæнтæм гæсгæ къласы кæцы бынат ахсыс, уый дæр базондзынæ. Урокты ранывæзтмæ цы ивддзинæдтæ бахæссынц, уыдон дæр электронон боныджы зынынц.
Ахуыргæнджытæн дæр онлайн боныгæй архайын æнцондæр у. Хæдзармæ куыстытæм мæ уæлæмхасæн æрмæджытæ дæр бафидар кæнынц: презентацитæ, тестытæ, къамтæ æмæ видеотæ. Сæ фæндтæ æмæ ахсджиаг куыстытæ рæгъмæ рахæссыны фадат дæр сын дæтты.
Ахуыртæ æнæ банымаинаг æфсонæй куы фæцух кæна скъоладзау, уæд йæ ныййарæг хъусынгæнинаг райсдзæн электронон боныджы. Уæвгæ, скъоладзауæн йæ хызынæй фæлтæрд гæххæттын боныг не ‘ппарын кæны. Бар ис — хæдзармæ куыстытæ дзы фысс æмæ йæм дзы бæрæггæнæ æвæрын кæн.
Системæмæ бахизæн ис æрмæст портал “Госуслуги”-йы уылты. Электронон боныджы гæнæнтæ æрвылаз фылдæрæй-фылдæр кæнынц. Гæххæттытимæ ракæ-бакæ та — къаддæр.
