Æртыккæгæм къласы ахуыргæнинæгтæ зонгæ кæнынц мивдисджытимæ. Хæрзцыбыр разæфтуаны руаджы иу дзырдæй бынтон æндæрхуызон рауайы. Темæ æнцон нæу, уымæ гæсгæ йæм сывæллоны сцымыдис кæнын хъæуы. Уый йæ къухы бафтдзæн æви нæ, ууыл Альбинæ цалдæр боны хъуыды кодта. Ахуыргæнæджы куысты ацы миниуæг ахсджиагдæрыл нымайы. Рауадис ын, æви нæ, уымæн дзуапп радтой сабитæ.
Ног Бæтæхъойыхъæуы иуæндæсæм къласы ахуыргæнинаг Дзиуаты Альбинæ йæ хъæддыхæй зоны ахуыргæнæджы дæсныйад кæй райсдзæн, уый. Ныр урок раттыны фæстæ та йæ фæнд ноджы фæфидар. Æвзонг чызг ирон æвзагæн стыр аргъ кæны. Йæ уавæр ын æмбары æмæ йын педагог суæвгæйæ лæггад кæндзæн.
Зонындзинæдтæ парахат кæнынæн пайда у ахуырады министрад æмæ Цæгат Ирыстоны паддзахадон университеты иумæйаг проект “Педагогическая проба”. Йæ фæлгæты ахуыргæнæг суæвын кæй фæнды, уыцы иуæндæсæмкъласонтæн ис хи педагогы бынаты бафæлварыны фадат.
Профориентацион проект æххæст кæнынц дыккаг аз. Йæ архайджытæн ЦИПУ-йы педагогтæ цалдæр мæйы дæргъы аразынц дæсныйадæвдисæн ахуыртæ. Кæронбæттæны скъоладзаутæ бацæттæ кæнынц гом урок. Иууылдæр райсынц сертификаттæ. Уыимæ ма паддзахадон университеты педагогон дæсныйадыл ахуыр кæнын фæнд чи скæна, уыцы рауагъдонтæн сæ бæрæггæнæнтæм бафтаудзысты фæйнæ 5 уæлæмхасæн баллы.
