Сæйрагдæр у цæрæгойты хиуыл сахуыр кæнын. Фæлтæрдджын ветеринар Сидахъаты Викторияйæн уыцы хъуыддаг зын нæу. Диссаг у, фæлæ йæ стурвос æй йæ хъæлæсæй дæр зонынц. Сæхимæ йæ уадзынц. Æнæ прививкæйæ гæнæн нæй. Стурвосы хъахъхъæны фаднизæй. Уæвгæ, адæймагыл дæр хæцы. Эпидеми ма ‘руадзыны тыххæй вакцинаци райдайынц рагацау.
Стурвосыл ис мæнæ ахæм сæрмагонд биркæтæ. Сæ номыртæм гæсгæ сæ бахæссынц иумæйаг хыгъдмæ. Республикæйы ацы процедурæ цæрæгойтæн у æмхуызон. Афтæмæй, æнцондæр у сбæрæг кæнын стур прививкæгонд у æви нæ, уый. Южныйы посолочы фос чи дары, ахæмтæ бирæ нæй. Чертхъоты Малхазмæ ис 13 стуры. Се ‘ппæт дæр вæййынц хизынмæ, уымæ гæсгæ сæм ис лæмбынæг цæстдард.
Алы низы ныхмæ дæр ис хицæн вакцинæ. Ветеринартæ кусынц сæрмагонд фæткмæ гæсгæ, уый хыгъд скæнынц диагностикæ. Стурæй сисынц туг, цæмæй йæ сбæрæг кæной лейкоз, бруцеллез кæнæ йæм рæуджыты низтæ ис æви нæ, уый. Фæлæ сдзæбæх кæнæн цы низтæ нæй, ахæмтæ дæр ис. Се ‘хсæн фадниз.
Бæрц сбæрæг кæнынц рагацау. Ветеринар бадæтты курдиат æмæ уый фæстæ райсы прививкæтæ. Арæх стуры уавæр раиртасынц фосы хицæуттæ сæхæдæг дæр. Æххуысы фæдыл фæсидынц ветеринармæ. Прививкæйы фæстæ фос сæхи иухуызон нæ фæдарынц.
Фос хъахъхъæныны институтмæ мартъийы арвыстой фаднизы ныхмæ прививкæ кæмæн скодтой, ахæм 450 стуры туджы иртæстытæ. Цæгат Ирыстоны эпилдемиологон уавæрмæ уæлдай цæстдард ис. Арæх специалисттæм сæвзæры алхуызон фарстатæ. Фосæн прививкæ скæнын алкæй нæ фæфæнды.
Ныртæккæ Цæгат Ирыстоны фадниз кæмæ ис, ахæм фос нæй. Уавæр æппынæдзух иртасынц ветеринартæ. Бахъуаджы рæстæг цæттæ сты æмбæл гæ мадзæлттæ снысан кæнынмæ. Лæмбынæгдæр хъуамæ уой фермертæ сæхæдæг дæр. Специалисттæ зæрдыл лæууын кæнынц, хæдзарон фосæн дзуапддæтæг йæ хицау, кæй у, уый.
