Республикæйы æмæ горæты боны агъоммæ Хъесаты Колкайы уынджы ‘рдыгæй Терчы былгæрон кæронмæ рацараздзысты. Бæрæгбон уыдзæн хæстæгдæр фæлладуадзæн бонты, 23-æм æмæ 24-æм сентябры.
Уый тыххæй аппаратон æмбырды фехъусын кодта Дзæуджыхъæуы администрацийы сæргълæууæг Милдзыхты Вячеслав. Куыстытæ цæуынц æхсæвыгæтты дæр, объект афойнадыл ма сцæттæ уа, уымæй тæссаг нæу.
Ныхас ма цыд эпидемиологон уавæрыл. Низы бæрæггæнæнтæ ивгъуыд къуыри нормæйæ нæ ахызтысты. Фæлхасгæнджытæм цæстдарды регионалон управленийы разамонæг куыд фæбæрæг кодта, афтæмæй Цæгат Ирыстоны æрвылазон кампанийы фæлгæты гриппы ныхмæ прививкæ скодтой 7 700-йæ фылдæр сывæллонæн, 25 мин æмæ æрдæгмæ æввахс хистæр кары адæмæн. Æнæниздзинад хъахъхъæнынады министр Тебиаты Сосланы ныхæстæм гæсгæ, тагъд медицинон æххуысы дохтыртæн цы уæлæдарæс хуыйынц, уый мæйы кæронмæ сцæттæ уыдзæн.
Регионы разамонæг бæрнадæн бауайдзæф кодта, фарстайыл куыст кæй ныддæргъвæтин, уый тыххæй. Дзырдтой Терроризмы профилактикæйы æппæтадæмон центры экспозици саразыныл дæр, бахъæудзæн ын дыууæ мæйы. Беслæны 1-æм скъолайы терактимæ баст къамтæ абоны онг æрæмбырд кодтой 500-йæ фылдæр. Сергей Меняйло фæбæрæг кодта, архив æппæт террористон актты тыххæй æрмæджытæй æмбырдгонд кæй хъуамæ уа.
Зынгсирвæзты ныхмæ æдасдзинады домæнтæ сбæрæг кодтой республикæйы 60 ахуырадон уагдоны. Басгæрстыты хатдзæгтæм гæсгæ рабæрæг 783 фæткхæлды. Мониторинг Æнæнхъæлæджы уавæрты министрад æмæ прокуратурæ расидтысты сентябры райдианы. Скъолатæ æмæ сывæллæтты рæвдауæндæтæн сæ фылдæры фиппаинæгтæ аиуварс кодтой. Регионы разамонæг Сергей Меняйло бæрнон кусджытæн бабар кодта мониторингы домæнтæм æркæсын æмæ сæ сног кæнын.
