Наркотикты æнæзакъон зилдухимæ баст фыдракæндтæ бæрæг кæныны фарстатыл ныхас цыд дзуапдæттæг къамисы æмбырды. Амыдта йæ республикæйы сæргълæууæг Сергей Меняйло.
Наркотиктимæ баст фыдракæндты нымæц къаддæр кæныны нысанимæ таможнæйы æмæ контролон уадзæн пунктты архайд скæнын хъæуы нырыккон домæнтæм гæсгæ. Сергей Меняйло куыд фæнысан кодта, афтæмæй дзуапдæттæг ведомствоты сæйраг хæс у, республикæйы наркотиктæй чи пайда кæны, уыцы адæмы нымæц фæкъаддæр кæнын. Фыдгæнджыты къордты архайд куыд бæрæггонд цæуы, стæй дзы æхца кусын ма уадзыны мадзæлтты тыххæй радзырдта наркотикты зилдухмæ цæстдарды управленийы хицау Хынцæгты Нодар.
Куыд фæнысан кодта, афæмæй афæдзы райдианæй барадон оргæнтæ рабæрæг кодтой 41 фыдракæнды. Уыдонæй 11 хъуыддаджы ныридæгæн æрвыст æрцыдысты тæрхондонмæ. Сергей Меняйло бабар кодта фылдæр æргом аздахын, наркотикты æнæзакъон зилдухы уголовон хъуыддæгты фӕрцы æхца бакусын кæй фæнды, уыдонмæ. Æмбырды ма ныхас цыд арæнты сæрты наркотиктæ ласыны зыкъонхæлдты тыххæй дæр. Арæнхъахъхъæнæн управленийы хицауы хæстæ рæстæгмæ æххæстгæнæг Андрей Ермаков куыд радзырдта, афтæмæй афæдзы райдианæй не ‘руагътой 3 ахæм цауы. Наркотикты ныхмæ къамисы æмбырды ма ныхас цыд, наркотиктæй пайда кæнынад æнæниздзинады цы уæззау фæстиуджытӕ расайы, уыдоныл дæр.
