Рӕмонты Липæ стыр бинонты хистæр у: æртæ фырты, сæ цот æмæ уыдоны кæстæртæ. 93 аздзыд сылгоймаг, зæгъæн ис, æмæ йӕ цард арвыста ам, Сырх Дыгуры. Ӕнцон нӕ уыд, зæгъы. Раджы баззад ӕнӕ фыдӕй, йӕ сабибонтӕ арвыста хӕстон азты, уый фæстæ йӕхӕдӕг, сидзæргæсæй, цоты хъомыл кодта. Ныртӕккӕ йын сӕйрагдӕр у, цæмæй хиуæттæ ӕнӕниз уой, хӕдзары та сабырдзинад куыд уа, уый.
Липæ сӕтты: уал азмæ сахуыр æрмæст йӕ цотыл узæлын нæ. Ӕххуыс кодта чындзытӕн, йӕ цоты царды раст фæндагыл æвæрдта, бахъуаджы сахат иу хиуæтты фарсмæ иу балæууыд. Ӕмӕ ма абон дӕр архайы сæ цуры уӕвыныл: бинонты хъуыддӕгтӕ ӕнӕ Липæйы уынаффӕйӕ æххæстгонд нӕ цӕуынц.
Хъæуы куырыхон хистæртæй ма иу 96-аздзыд Елойты Розæ. Йæ цоты цот сты иуæндæсæй, æппæты кæстæрыл цæуы æрмæст æртæ азы. Розæ дæр бирæ фæлварæнтæ бавзæрста: хӕст, уӕззау куыст, хæсты фæстæ хæдзары арæзтад. Фӕлӕ йӕ сӕйрагдӕр фӕнды, цæмæй ӕрыгӕттæ уой хӕларзӕрдӕ æмæ куыстæй ма тæрсой.
Ахӕм цаутæ Сырх-Дыгуры бирæ сты. Ацы аз дӕр та ам ныффыстой рекорд бирӕ чи фӕцард, уыдоны нымӕцмӕ гӕсгӕ. 90 азӕй уӕлӕмӕ кӕуыл цӕуы, ахӕм цӕрджытӕ — 19 адӕймаджы. Сырх-Дыгуры фыццаг хатт Уӕрӕсейы рекордты чиныгмӕ бахастой 2021-æм азы. Абон нӕ бӕстӕйы иунӕг хъӕу у, ацы реестрмӕ ӕртӕ хатты чи бахауд, ахӕм.
Администрацийы дзурынц: дӕргъвӕтин царды бӕлвырд наукон сусӕгдзинад ам ничи зоны. Карджын цӕрджытӕ сӕхӕдӕг арӕхдӕр фæзæгъынц хӕххон сыгъдӕг уӕлдӕф, сӕ цӕхӕрадонӕй хуымӕтӕджы хӕринаг ӕмӕ бирӕ змӕлыны ахуыр.
Сырх-Дыгуры администрацийы ныридӕгӕн цӕттӕ кӕнынц документтӕ ног ӕппӕтуӕрӕсеон ӕнтыстдзинад официалон ӕгъдауӕй сбӕлвырд кӕныны тыххӕй. Ныр та уал хъӕуы хуымæтæджы цӕрынц, фæллой кæнынц ӕмӕ алы райсом дӕр сæ кæстæртыл æхсызгонæй æмбæлынц.
