Транскамы ссардтой фæндаджы тæссагдæр бынæттæ

Транскамы ссардтой фæндаджы тæссагдæр бынæттæ. Мониторинг сарæзтой Æнæнхъæлæджы уавæрты министрады, фæндаггон службæты æмæ æрдзхъахъхъæнынады ведомствæты кусджытæ. Басгæрсты рæстæг сног кодтой фæскавказы сæйраг бастдзинады фæрæзы сæйраг бæрæггæнæнтæ. Специалисттæ фæнысан кодтой, зæйтæ æмæ донивылдæй тæссаг бынæттæ. Бахæсдзысты сæ ирвæзынгæнджыты картæтæм. Афтæмæй рагзагъдтæ фæбæлвырддæр уыдзысты. Адæмæн рагацау фехъусын кæндзысты фæндаг сæхгæныны тыххæй. Транскам куыд раздæр, афтæ ныр дæр нымад у тæссагдæр хайыл. Зымӕг ӕмӕ уалдзӕджы райдайӕны хæдтулгæты змæлд бауромынц зӕйты аххосæй. Сæрды æмæ фæззæджы та тæрккъæвдатæ расайынц дур зæйтæм. Специалисттæ зæгъынц: фæндаг æрæхгæныны тыххæй уынаффæ рахæссынц, æцæг тасдзинад куы сæвзæра, уый размæ. Уый шофырты æдасдзинады тыххæй. Уавæр куы фæхуыздæр уа, уæд фæндаг ныссыгъдæг кæнынц, аиуварс кæнынц æрдзон фæзынды фæстиуджытæ.