Цӕмӕй ацы элемент ӕнтыстджынӕй сӕххӕст кæн, уый тыххӕй 9-аздзыд Гуыбаты Владислав къуыри 6 боны архайдта 4 сахаты. Ахӕм хиуыл куыст ӕнӕпайда нӕ фæци. Фӕстаг ерысты — гимнастикӕйы лигӕйы — лӕппу бацахста фыццаг бынат. Ӕмӕ йæ фæрцы йæ командӕ сси уæлахиздзау.
Гимнастикӕйы лигӕ — бӕстӕйы ӕппӕты егъаудӕр ерыстӕ кӕстӕр картӕн ӕмӕ разрядтӕн. Цӕгат Ирыстон сæ ныр фӕндзӕм аз архайы фӕд-фӕдыл. Ацы хатт республикӕ арвыста дыууӕ командӕйы. Фæсивæд сызгъӕрин ӕрбаластой командон ӕмӕ сӕрмагонд хыгъды дæр.
Раздӕр-иу сывæллæтты ӕндӕр залы хъуыд архайын. Уым бынат æмæ ифтонггарз нӕ фаг кодта. Ныртӕккӕ ЦИПУ-йы ректор Огъуаты Аланы фӕрцы сывӕллӕттӕн фӕзынд ног фӕзуат тренировкӕтӕн. Фӕлӕ уӕддӕр спорты бæрзæндтæм фӕндаг ӕнцон нӕу. Республикӕйы хуыздӕр гимнасттӕн сӕ бон нӕ баци ерыстӕм ацӕуын. Зын элементтӕ сæххæст кæнынæн хъуыд зынаргъ ифтонггарз.
Ацы ифтонггарз кӕй нӕй, уыцы фарста спонсорты фӕрцы алыг кӕнын къухы бафтыд. Ныртӕккӕ скъоламӕ ис ӕппӕт дӕр, цӕмӕй цӕттӕ кӕна ног чемпионтӕ. Чысыл гимнасттӕн дӕр ис уӕлахизтӕ. Тренер Сусанна Минасовайы хъомылгӕнинӕгтӕ ерыстӕм ацыдысты ӕрмӕст ӕртыккаг хатт. Ӕмӕ ныридӕгӕн равдыстой хорз ӕмвӕзад, кæд сабитимӕ кусын зын у, уӕддӕр.
Тренертӕн уӕлахизыл сахуыр кӕнынæй ахсджиагдæр у адӕймаджы схъомыл кӕнын. Карэн Данилянцы ныхӕстӕм гӕсгӕ, командӕйы нӕй хӕлӕг. Ахуыр кӕнынц ӕмбалыл мӕт кӕнын ӕмӕ йын йе ‘нтыстыл цин кӕнын. Тренерты уырны: сывӕллон цавӕр адӕймагӕй схъомыл уыдзӕн, уый цыфӕнды майдантӕй дӕр ахсджиагдӕр у.
Разӕй иугонд командӕйӕн “Стыр финалмӕ” æвзæрстытæ. Æппӕтуӕрӕсеон ерысты уыдзысты Дагестан, Краснодары край, Волгограды минæвæрттæ дæр. Тренировкӕтӕ дарддӕр цӕуынц раздӕры фæткмæ гæсгæ. Ныридӕгӕн къухы цы уӕлахизтæ бафтыд, уыдон сбӕлвырд кодтой: ирон гимнастикӕйы скъола у бӕстӕйы тыхджындӕртӕй иу.
