Цæгат Ирыстон райсдзæн 5 миллиард æмæ 500 милуан соммæ `ввахс. Уый уымæн, æмæ нæ республикæ ацы аз архайы алыхуызон къабæзты 12 национ проекты. Республикæйы æххæстгæнæн оргæнты уæнгтæ сæххæст кодтой федералон центры æппæт домæнтæ дæр. Уыимæ ма æмбæлгæ `мгъуыдмæ бацæттæ кодтой регионалон паспорттæ дæр.
Уый тыххæй дзырдтой координацион æмбырды æххæстгæнæн оргæнты разамонджытимæ. Ацыд нæ республикæйы сæйраг федералон инспектор Челæхсаты Владимир æмæ нæ республикæйы хицауады сæрдар Тускъаты Таймураз разамындæй. Æмбырды куыд фæнысан кодтой, афтæмæй ахæм мадзæлттæ хорз ахъаз фæуыдзысты республикæйы æххæстгæнæн æмæ бынæттон хиуынаффæйады оргæнты профессионалон цæттæдзинад рабæрæг кæнынæн. Федералон хицаудзинадимæ хъуамæ æппынæдзух æмгуыст кæной.
Тускъаты Таймуразы ныхæстæм гæсгæ, 2024-æм азы `мгъуыдмæ арæзт национ проекттæ хъуамæ хуыздæрырдæм фæбæрæг уой адæмы цардыл, æдасдзинад æмæ æнцонвадаты уавæртыл.
