Цæгат Ирыстоны дарддæр цæуы Кавказы фыццаг инвестицион равдыстмæ цæттæгæнæн куыст. Хицауады сæрмагонд æмбырд ацыд премьер Дзанайты Барисы разамындæй.
Экономикон райрæзты министр Кучиты Зауыр куыд радзырдта, афтæмæй Цæгат Ирыстон стенд аразгæйæ, спайда кæндзæн интерактивон гæнæнтæй. Сæ фæрцы мадзалы уазджытæ фендзысты бынæттон товаруадзджыты продукци. Сæйрагдæр у «Æнтыстджын проекттæ» равдисын. Баст сты агропромышленнон æмæ транспортон-логистикон къабӕзтимæ, ног туристон бынæттæ æмæ балергæсаг дарыны хæдзарад саразынимæ, стæй туристон-рекреацион комплекс «Мамысонимæ». Дзанайты Барис дзуапдæттæг кусджытæн бабар кодта сыхаг регионтимæ æмæ бизнес-æхсæнадимæ æмгуыстад кæнын. Мадзалы фæзуатыл дыууæ боны дæргъы цæудзысты сесситæ, æмбырдтæ.
Уæ зæрдыл уын æрлæууын кæндзыстæм, Кавказы инвестицион равдыст ацæудзæн 3-4 майы Минералон Дæтты горæты. Расидтысты йæ Цæгат Кавказы федералон зылды регионты райрæзты тыххæй.
