Цæгат Ирыстоны ма фæзындзæн иу станцæ “Лесотерапия”, зæгъгæ — ныр Мæздæджы

Цæгат Ирыстоны ма фæзындзæн иу станцæ “Лесотерапия”, зæгъгæ — ныр Мæздæджы. Хъæугæ æмæ ахсджиаг проект республикæйы цæрджыты зæрдæмæ тынг фæцыд. Ныр парахат кæны йæ арæнтæ. Йæ сæйраг нысан хуымæтæг, фæлæ ахсджиаг у. Ирыстоны хъæдты тезгъогæнæн фæзуæтты лæвар райсæн ис сæрмагонд кресло ацæргæ адæймæгтæн, се ‘нæниздзинад хъыгдард кæмæн у, уыдонæн, сабитæн, кæнæ сæрмагонд æфсæддон операцийы ветерантæн. Ныртæккæ ахæм фадат ис Дендрарийы. Тезгъо кæнын зын кæмæн у йе ‘нæниздзинады уавæртæм гæсгæ, уыдонæн проект у тынг ахсджиаг. “Лесотерапия” сын æххуыс у сыгъдæг уæлдæфмæ рацæуынæн, æрдзы хъæбысы тезгъо кæнынæн. Проекты автор у бирæсывæллонджы мад, сæрмагонд æфсæддон операцийы архайæджы бинойнаг Тотраты Линæ.