Цæгат Ирыстоны низы тых чысыл фæсаст, фæлæ эпидемиологон уавæр уæддæр нырма у зæрдæхсаинаг. Специалистты сæйраг амынддзинад – вакцинаци ацæуын, цæмæй цæрджытæм сæвзæра коллективон иммунитет. Иутæ ацы хъуыдыимæ разы сты. Æмæ прививкæтæ дæр скодтой. Фæлæ се ‘ппæт афтæ нæ хъуыды кæнынц.
Вакцинаци, прививкæ æмæ QR-кодтæ. Не ‘ппæт дæр бафиппайдам, ацы дзырдтæ, фæстаг рæстæг, нæ æрвылбоны ныхасы арæхæй арæхдæр кæй абухынц. Фыццаджыдæр уал, не ‘ргом аздахдзыстæм статистикæйы бæрæггæнæтæм.
Зæгъын хъæуы уый, æмæ Цæгат Ирыстоны æдæппæтæй вакцинаци чи ацыд, уыдоны нымæц у 186 мины æмæ 9 адæймаджы, уыдонæй 171 мин 337-æй вакцинæйæн скодтой йæ дыууæ компоненты дæр. Фæнысан кæндзыстæм уый, æмæ 60-ай азæй фылдæр кæуыл цæуы, уыдонæй вакцинаци ацыдысты 35 мин 844 адæймаджы. Специалисттæ куыд зæгъынц, афтæмæй коллективон иммунитет сæххæст кæнынæн вакцинаци хъуамæ ацæуой цæрджыты 80%, уырдæм хауынц низ йæхиуыл чи базæрста, уыцы цæрджытæ дæр.
QR-код райсын йæ бон у:
- Вакцинацийы цикл æххæстæй чи ацыд, уымæн.
- Фæстаг афæдзы ‘рдæг коронавирусы низæй рынчын чи уыд æмæ паддзахаддон лæггæдты йæхи чи срегистраци кодта, уыдон.
- Ахсджиаг у, цæмæй низæй рынчын кæй уыди адæймаг, уый нысангонд уа федералон регистры дæр.
QR-код райсын йæ бон нæу:
- Низæй рог хуызы рынчын чи уыд, уыимæ ма дохтыры æххуысмæ чи нæ бацыд, уыдонæн.
- Вакцинацийы цикл æххæстæй чи нæ ацыд, ома, дыууæ компонентæй æрмæст фыццаг чи скодта. Уыдон райсдзысты æрмæст сертификат. QR-код фæзындзæн æрмæст дыккаг прививкæйы фæстæ.
- Вакцинаци чи ацыд, уыдонæн QR-кодæй пайда кæнын сæ бон у афæдз. Коронавирусæй рынчын чи уыд, уыдонæн та — афæдзы ‘рдæг.
Афтæмæй, нæ бон у ахæм хатдзæгтæ скæнын, æмæ специалисттæ коллективон иммунитет кæй хонынц, уымæн сæвзæрын нырма йæ бон нæу. Ууыл абон дзурынц нæ республикæйы æнæниздзинад хъахъхъæнынады министрады дæр.
Прививкæ чи скодта, уыдоны нымæц нæ республикæйы чысыл фæфылдæр. Цæрджыты хъыдытæ алыхуызон сты.
Низы ныхмæ тох кæнынц дунейы медицинон æхсæнад. Ирыстоны дохтыртæ дæр уыцы куысты сæхи не ‘вгъау кæнынц. Республикон Клиникон рынчындоны дохтыр-тарвматолог Къалаты Ацæмæз дæр ныр ис сырх зонæйы. Æрыгон специалист адæмæн æххуыс кæны низ фыццаг хатт куы апарахат, уæдæй нырмæ.
Уавæрæн хатдзæгтæ скæнын æнцон нæу. Мах бацархайдтам алывæрсыг информаци ссарыныл æмæ йæ адæмы размæ рахæссыныл.
