Цæгат Ирыстоны бæрæг кæнынц гонконгаг грипп. Фæлхасгæнджытæм цæстдарды управленийы куыд хъусын кæнынц, афтæмæй республикæйы апарахат вæййы æрвылаз. Арæхдæр æй адæм хæссынц рог хуызы, фæлæ лæмæгъ иммунитетимæ, зæрдæ æмæ дадзинты, уыимæ æндæр алыхуызон низтæ кæмæ ис, уыдонæн грипп вæййы уæззаудæр хуызы. Тæссаг у æнхъæлцау сылгоймæгтæ, сывæллæттæ æмæ 65 азæй фылдæр кæуыл цæуы, уыдонæн дæр. Вирус фæзыны æнæнхъæлæджы, схизы буары тæвд, адæймаг йæхи фенкъары лæмæгъ. Миниуджыты ‘хсæн ма ис сæры рыст æмæ хуыфæг.
Фæлхасгæнджытæм цæстдарды управленийы хъусынгæнинагмæ гæсгæ, æхснырсæджы фæдыл æххуысмæ чи сиды, уыдонæн сæ 70% сты сывæллæттæ. Эпидемиологон уавæр у æмбæлгæ къæпхæнæй бæрзонддæр. Дохтыртæ сидынц цæрджытæм, цæмæй се ‘нæниздзинадмæ бæрнондæрæй кæсой. Афойнадыл цæуой дохтыртæм, æххæст кæной санитарон домæнтæ. Æрмæст афтæ ис грипп парахат кæнын ма бауадзын, хи бахизын уæззау фæстиуджытæй.
