Кæсаг ахсын бирæ нæлгоймæгтæн у уарзондæр ирхæфсæн мадзæлттæй иу. Уымæ гæсгæ кæсагахсыны республикон чемпионаты бацархайын бирæты бафæндыд. Абоны онг спорты ацы хуыз парахат у дунейы бирæ бæстæты. Кæсаг ахсынæй чемпионат цымыдисаг бирæтæм фæкасти. Ерысты архайдтой канд бынæттон цæрджытæ нæ, фæлæ ма Уæрæсейы æндæр регионты минæвæрттæ дæр.
Чи стырдæр кæсæгтæ æрцахсдзæн æмæ кæмæн уыдзысты фылдæр. Кæсаг ахсыны спорт æрæджы дæр ма бирæтæн уыди æнæзонгæ. Ныридæгæн та дзы æрвылаз нæ республикæйы аразынц ерыстæ. Ам дæр иннæ спорты хуызтау хъæуы цырддзинад, æмæ арæхстдзинадыл кусын, æдзух фæлтæрддзинад уæлдæр кæнын. Алы архайæгæн дæр ис йæхи сусæгдзинæдтæ, алчидæр уæлахизмæ цæуы йæхи фæндагыл.
Ерыстæ цæунц Октябрскæйы. Комбелеевкæйы былмæ æрцыдысты командæтæ Мæскуыйæ, Санкт-Петербургæй, Ростов-на-Дону-йæ æмæ Донецкæй. Бирæтæ дзы Ирыстоны фыццаг хатт не сты. Куыд зæгъынц, афтæмæй раздæры балцытæй сæ зæрдæтæ тынг барухс сты æмæ ногæй æрыздæхтысты ардæм.
Камбелеевкæйы дон ерысты рæстæгмæ адих кодтой 60 секторыл. Алчидæр кæсаг ахсдзæн йæхи бынаты. Цæмæй спортсментæн сæ дæсныйад равдисыны фадат уа, уый тыххæй мадзал аразджытæ доны ауагътой 1 мин кæсаджы бæрц.
Цæгат Ирыстоны ацы ерыстæ аразы нæ республикæйы кæсагахсæн спорты федераци. Сæ агъоммæ æнæмæнг цæугæдæттæм базилынц – ссыгъдæг сæ кæнынц.
Ацы спорты хуызæн ис йæхи домæнтæ. Уыдонæй фыццаг – кæсæгты ма бахъыгдарын. Ерысты архайджытæ цы кæсæгтæ æрцахсынц, уыдоны æнæмæнгæй арæхстгай фæстæмæ ауадзынц.
Дыууæ боны дæргъы йæхи хуыздæр чи равдиса, уыдоны схорзæхджын кæндзысты кады гæххæттытæй. Уæлахиздзау та рамбулдзæн кæсагахсæн спорты федерацийы кубок.
