Кувæндоны сæйраг бынат. Ам, таурæгъмæ гæсгæ, Зæдæлески Нана æмбæхста знаджы къухтæй чи фæмард, уыцы аланты фæдонты. Хъæбатыр сылгоймаг æрæмбырд кодта æгас комы сывæллæтты, хаста сæ хъæддаг дыргътæ æмæ алыхуызон зайæгойтæй. Бæстыхайы астæу — стыр дур. Куыд дзурынц, афтæмæй йыл æндзæвыдысты Нанайы къухтæ.
Æгъдаумæ гæсгæ, адæм цыдысты æртыгай чъиритæ æмæ ирон бæгæныимæ. Куывтой æмæ кордтой хорздзинæдтæ.
Афтæ зæгъынц, Нана сывæллæтты кæй хъахъхъæдта, уымæ гæсгæ йæ тыхтæ абон æххуыс кæнынц зæнæг кæмæн нæ цæуы, уыцы сылгоймæгтæн.
Кадджын бæрæгбоны рæстæг дæрддзæф хæххон хъæу, кæддæрау, цыма ногæй базмæлы. Ирон кæфтытæ æмæ зарджытæ та зæлыдысты æгас Дыгургомыл. Концертон программæ рауад хъæздыг æмæ цымыдисаг.
Зæдæлески Нанайы бæрæгбон вæййы августы фыццаг сабаты. Фысымты сбæрæг кæнынц рагацау, равзарынц æртæ бинонты. Уыдонмæ фæхауы кусæрттаг. Рахсидынц бæгæны æмæ скæнынц чъиритæ. Ацы бон бынæттон цæрджытæ нымайынц иудзинады боныл.
Æрвылаз Дæллаг Зæдæлескмæ æрцæуынц ацы комæй рацæугæ адæм, архайынц æгас бинонтæй цæуын. Уырны сæ — бæрæгбоны ахсджиагдзинад æмæ Нанайы хъайтардзинад кæстæртæ хъуамæ зоной гыццылæй фæстæмæ.
Музей байгом 15 азы размæ. Хæдзары мидæгæй — раджы заманы дзауматæ. Æвæццæгæн, уымæн æнкъары ам адæймаг йæхи æндæрхуызон. Агъуысты астæу — Нана æмæ сабиты сурæттæ. Чысыл дарддæр — къона, авдæн æмæ хæдзары дзауматæ. Алæмæты тых канд бынæттон не ‘нкъары, фæлæ уазæг дæр.
Дыгургом бабæрæг кодтой хицауады уæнгтæ дæр. Сергей Меняйло фæнысан кодта, истори бахъахъхъæнын ахсджиаг кæй у.
Зæдæлески Нанайы бæрæгбон официалон æгъдауæй сси националон 2023-æм азы, Сергей Меняйлойы бардзырдмæ гæсгæ.
