Цæгат Ирыстоны схорзæхджын кодтой «Уæрæсейы кадджын донорты». Риуылдаргæ нысæнттæ æмæ донорты æвдисæндартæ райстой туджы Республикон станцæйы.
Хæрзиуджыты аккаг систы 12 адæймаджы. Санитарон-эпидемиологон уавæры тыххæй станцæмæ сæ лæвæрттæ райсынмæ æрбацыдысты æрмæст фондзæй. Алчидæр сæ туг радта 40 хаттæй фылдæр. Донорты змæлдмæ стыр æвæрæн кæй бахаста уый фæдыл хорзæхгонд æрцыд Цæгат Ирыстоны медицинон колледжы директор Реуазты Таймураз дæр. Туджы станцæйы кусджытæ арфæ ракодтой, адæймаджы æнæниздзинадмæ куыдфæндыйы цæстæй чи нæ кæсы, уыцы донортæн. Уæ зæрдыл уын æрлæууын кæндзыстæм, донор уæвын у барвæндон хъуыддаг. Уæвгæ, ахæм хъуыды кæмæ разына, уымæн спайда кæнæн уыдзæн социалон льготæтæй.
