Дохтырты къухты — æлхъивæнтæ ӕмӕ скальпельтӕ. Операцигæнæны цӕуы тох — Къарджиаты Дзерассӕйы цардыл. Суанг сабибонтӕй фӕстӕмӕ йæм ис сæкæрниз. Ӕрӕджы фæкарз æмæ йæ цæф уыргтыл сӕмбӕлд. Фӕстаг афӕдзы ӕрдӕг чызджы цард аразгӕ уыд диализы аппаратӕй. Фервӕзын кӕнын ӕй йӕ бон уыд ӕрмӕстдӕр трансплантацийӕн. Ӕмӕ донор цӕстыфӕныкъуылдмӕ разынд.
Чызгæн сбæззыд йæ фыды уырг. Рабæрæг сæм иттӕг хорз æмхуызондзинад: туг, резус-фактор. Тотрадз иу уысммӕ уынаффӕ рахаста. Фæлæ Дзерассӕйӕн йӕхицӕн бирӕ лӕгъстӕ кӕнын бахъуыд. Йæ фыдæн тарсти — уӕддӕр ыл 69 азы цæуы. Фӕлӕ кар ницы хъыгдарӕг фӕци. Тотрадз афтӕ фидар разынд, ӕмӕ йӕ йӕ чызгӕй къуыри раздӕр рафыстой сӕхимӕ.
Нырма реабилитацийы фӕндаг даргъ у, фӕлӕ абон Дзерассӕ фыццаг къахдзӕфтӕ кӕны. Дохтыртӕ куыд зæгъынц, афтæмæй дыууæ пациенты уавӕр дӕр у ӕнӕфӕцудгӕ. Операци ацыд ӕнтыстджынӕй. Тӕссаг уыд, фӕлӕ сӕ трансплантолог Зохъоты Аланы арӕхстдзинад ныфс бауагъта.
Операци ахаста 6 сахатӕй фылдӕр. Дыууӕ командӕйы куыстой фӕрсӕй-фӕрстӕм: оргæны райст ӕмӕ йæ трансплантаци цыдысты уыцы иу рӕстӕг. Ӕппӕт дӕр иу нысаны сӕраппонд — чызгӕн ног, æнæниз цард балӕвар кӕнын ӕнӕ диализæй.
Ныр Дзерассӕйы сӕйраг нысан у йӕ хъарутӕ сног кӕнын. Цӕгат Ирыстоны уырджы трансплантаци кодтой дыккаг хатт. Раздӕр-иу рынчынты тӕхын бахъуыд бӕстӕйы ӕндӕр регионтӕм. Фӕлӕ афӕдзы ӕрдӕджы размӕ республикӕ стыр къахдзæф акодта размæ. Ныр ирвӕзынгӕнӕн операцитӕ кӕнынц нæхимæ дæр, ӕмӕ æнæниз царды фадат фылдӕр адӕмæн фæзынд.
