Фарста, æнæмæнг, ахсджиаг у, фæлæ йæ сывæллæттæн амонынц рогдæр хуызы. Афтæмæй информаци æнцондæрæй бамбардзысты æмæ бахъуыды кæндзысты. Уæлдайдæр ныхас æдасдзинадыл кæй цæуы, уый тыххæй. Фæсивæдæн радзырдтой светофорты куысты, рухсздахæн æмæ фæндаггон нысæнтты тыххæй. Сывæллæтты уæлдай тынгдæр хъæуы хъахъхъæнын уынджы. Сырхауты Арианæ ахуыр кæны 8-æм къласы. Чызг арæх свæййы æвдисæн æнахъомтæ æмæ хистæртæ фæндаггон змæлды домæнты сæрты куыд ахизынц, уый.
Арæхдæр домæнтæ хистæртæ нæ феххæст кæнынц, уымæй æвзæр дæнцæг равдисынц сывæллæттæн. Уый та арæх, хъыгагæн, æвзæр фæстиуджытæм расайы. Стастистикæйы бæрæггнæнтæм гæсгæ, Уæрæсейы алы цыппæрæм фæндаггон фыдбылыз æрцæуы фистæгцæуджыты аххосæй. Изæрыгон, талынг афон ноджы тæссагдæр вæййы аваритæ æрцæуынæй.
Медицинон академийы та студенттæн равдыстой фæндæгтыл хи æдасæй куыд дарын хъæуы, уый тыххæй киноныв. Уый фæстæ баххæст кодтой тестытæ, æрмæг куыд бамбæрстой, уый фæдыл. Сæрæндæр архайджытæн радтой лæвæрттæ.
Федералон программæ “Фæндаггон змæлды æдасдзинад” нацпроект ” Цæрынæн инфраструктурæ”-мæ гæсгæ ахæм акцитæ Цæгат Ирыстоны сывæллæтты рæвдауæндæтты, скъолаты æмæ астуæккаг профессионалон ахуыргæнæдæтты фæнд кæнынц арæхдæр аразын. Паддзахадон инспектортæ, зæрдыл лæууын кæнынц, æрмæст фæндаггон змæлды домæнтæ æххæст кæнгæйæ ис хи фыдбылызæй бахизæн.
