Стыр Комдарæны фæстаг къуыри кæронмæ фæхæццæ кæны, уырыссагау æй хонынц страстная неделя. Куыстуаты архайд цæуы æнæрлæугæйæ. Бæрæгбоны агъоммæ цæттæ кæнынц Куадзæны гуылты алы хуызтæ.
Ссад, æйчытæ, нæлхæ, хусгонд дыргътæ – Куадзæны гуылы бындур. Хæринаггæнджытæ архайынц æрмæст пайдайаг продукттæй. Хыссæ кæнынц традиционон рецептмæ гæсгæ – рауайы фæлмæн æмæ хæрзад. Нона Алексанян дзулфыцæгæй кусы фондз азæй фылдæр. Зæгъы, сæйрагдæр сусæгдзинад – алцыдæр удыхъармимæ кæнын.
Æрвылбон ам цæттæ кæнынц æртæ мин гуылæй фылдæр. Классикон хуызтæй – рæсугъд сæрст æмæ æнахуыр дизайнимæ адджинæгты онг. Бæрæгбонмæ конд гуылтæ дисы ‘фтауынц сæ бæркадджын хуызæй.
Специалисттæ дæттынц амынддзинæдтæ гуылтæ раст равзарыны фæдыл. Фыццаджыдæр æддаг бакастмæ цæстдарын. Хъуамæ уа хæрзфых, бурбын, уыцы иу хуызон, раст сæрст æмæ дзадджын.
Ахсджиаг чырыстон бæрæгбоны агъоммæ горæты байгом сты Куадзæны армукъатæ. Дидинджытимæ, хойрæгтимæ æмæ æндæр дзауматимæ. Уруймæгты Георгий кæддæр ардæм йæ нанаимæ цыд. Ацы аз та сфæнд кодта йæхæдæг дæр бацархайын. Лæппу уæй кæны йæ мады конд мыдадзын цырæгътæ. Зæгъы, куыст домы къорд рæстæг æмæ быхсондзинад.
Абон райдайдзысты Чырыстийы бæрæгбоны хуыцаубонмæ цæттæ кæнын. Традицимæ гæсгæ чырыстон диныл хæст адæм ахордзысты æйчытæ, кæндзысты гуылтæ, сæ хæдзæрттæ аив кæндзысты. Фæлæ рох кæнæн нæ хъæуы, “Сыгъдæг Цыппæрæмы” ахсджиаг у уды сыгъдæгдзинад.
