Туризмы къабазы раззагдæр бæстæты фæлтæрддзинад райсын æмæ дзы нæ республикæйы спайда кæнын. Уый тыххæй Цæгат Ирыстоны паддзахадон университеты студенттæ ацыдысты фæсарæйнаг стажировкæ. Уæлдæр ахуыргæнæндон бафыста бадзырд туркаг туристон компани «Килит Глобал» æмæ йæ уæрæсейаг минæвæрттимæ. Фарон ЦИПУ-йы æртæ студентты абалц кодтой Анталимæ. 2 мæйы дæргъы куыстой гидтæй. Сæ зæрдæмæ фæцыд æви нæ, уый базыдта не сфæлдыстадон къорд.
Гид туристты зонгæ кæны Турчы культурæ, климæт æмæ историимæ аэропортæй фысымуатмæ фæндагыл, стæй фæстæмæ аэропортмæ куы фæцæуынц, уæд. Ацы куыст се ‘нцонтæй нæу. Бон æмæ ӕхсæв сæмхæццæ вæййынц. Уымæн æмæ куыст цæуы æнæ ‘рлæугæйæ.
Гиды хуызы сæхи бафæлварыны фадат фæци Цæгат Ирыстоны паддзахадон университеты студенттæн. Фарон сæрды ацыдысты стажировкæ Анталийы. Бакуыстой 2 мæйы дæргъы. Бичерахты Аслæнбег у экономикæ æмæ разамынды факультеты 4-æм курсы студент. Ахæм хуызы фæлтæрддзинад у стыр пайда, зæгъы лæппу. Ацы аз дæр фæнд кæны Турчы бакусын.
Туризмы къабазы сусæгдзинæдтæ базонын, фæлтæрддзинад фæфылдæр кæнын. Ахæм сты, сæ цард туризмимæ сбæттыны фæнд чи скодта, уыцы студентты нысæнттæ. Бугаты Кристинæ стажировкæйы рæстæг бакуыста мин доллары. Бантыст ын стыр фыдæбоны руаджы.
Фæсарæйнаг стажировкæтæ студенттæн сарæзтой ЦИПУ, туркаг туристон компани «Килит Глобал» æмæ йæ уæрæсейаг минæвæрттимæ бадзырд куы бафыстой, уый фæстæ. Программæ ныртæккæ кусы 2-ӕм аз.
Туркмæ алы аз дæр ацæуы милуан туристы. Бæстæ дунейы ахсы æхсæзæм бынат, туристтæ арӕхдӕр кæй æвзарынц, уыдоны хыгъды. Зæгъæн ис, æмæ Турчы туристон бизнес куыд аразгæ у, уый æххæстæй зонынц. Æмæ сæ фæлтæрддзинадæй фæхай кæнынмæ цæттæ сты. Уыцы зонындзинæдтæй спайда кӕнæн ис нæхи республикæйы, студентты ныхæстæм гæсгæ.
Фарон фæнд кодтой 30 студенты алы факультеттæй арвитын стажировкæмæ. Фæлæ, пандемийæйы аххосæй туристон сезон райдыдта фæстæдæр. Ацæуыны фадат сси æртæ студентæн. Стажировкæйы программæйы архайынц Уæрæсейы бирæ уæлдæр ахуыргæнæндæттæ. Ацы мæйы кæроны ма компани «Килит Глобал»-ы разамонджытæ бабæрæг кæндзысты ЦИПУ.
