Республикæйы Парламенты сæрдар Тускъаты Таймураз зонады боны агъоммæ раарфæ кодта Цæгат Ирыстоны ахуыргæндтæн. Каджын мадзалы архайджытæ æрныхас кодтой зонады райрæзты фарстатыл. Бæлвырддæр дзургæйæ та – æрыгон ахуыргæндты наукæйæ архайынмæ разæнгард кæныныл.
«Абон сын аразын хъæуы уавæртæ иртасæн куыст кæнынæн. Фæсивæд та хъуамæ æмбарой сæ ахадындзинад бæстæйы зонады райрæзты», – загъта Тускъаты Таймураз.
Ныхас ма цыд Уæрæсейы Президент ацы къабазы размæ цы ахсджиаг хæстæ сæвæрдта, ууыл дæр. Саразын хъæуы чысыл инновацион куыстуæттæ Уæлдæр ахуыргæнæндæтты бындурыл. Стæй импорт бынæттон продукцийæ баивыныл бакусын.
Уымæй уæлдай ма республикæйы ахуыргæндæ адæмы размæ рахастой сæ докладтæ. Сæ темæтæ сты алывæрсыг. Æрыгон иртасджыты цæдисы куыст, медикон-биологон наукæты райрæзт регионы, наукон-технологон проекттæ. Мадзалы ма ахуыргæндты схорзæхджын кодтой кады гæххæттытæй æмæ бузныджы фыстæджытæй.
