Ирд, йæхи, æмбал кæмæн нæй, ахæм стиль. Аивады дунейы йæ ном хъуыстгонд у. Сырх Дыгурæй рацæуæг Соскъиты Владимиры сфæлдыстадон фæндаг райдыдта Суриковы номыл Мæскуыйы паддзахадон институты. Уым зынгæ скульптор Павел Бондаренкойы разамындæй зонгæ кодта дæсныйады сусæгдзинæдтимæ. Фæстæдæр йæ куыстытæ систы канд Уæрæсейы нæ, фæлæ фæсарæнты культурæйы ахсджиаг хай. Соскъиты Владимир сразæнгард кодта æмæ баххуыс кодта бирæ æрыгон нывгæнджытæн. Сабеты Георгий мысы дæсныимæ куыд базонгæ, уый.
Соскъиты Владимир алыхуызон мæскуыйаг, уæрæсейаг, фæсарæйнаг æмæ æппæтадæмон равдыстыты архайæг, бирæ зынгæ куыстыты автор. Марина Цветаевайы цыртдзæвæн Тарусы, академик Пилюгины монумент Мæскуыйы, Гæздæнты Гайтойы цыртдзæвæн Парижы. Уый æрмæст йæ уацмысты чысыл хай. Дæсныйы сфæлдыстады стыр бынат ахсынц Хетæгкаты Къостайы скульптурон сурæттæ, æвæрд сты Петербургы, Дзæуджыхъæуы.
Дæсныйы сфæлдыстады уæлдай бынат ахсы национ символикæ. Соскъиты Владимир йæ куыстыты æргом кæны æрдзы аивдзинад, æмбал кæмæн нæй, уыцы истори æмæ Цæгат Ирыстоны хъæздыг культурæ. Йæ курдиатæн стыр аргъ кæнынц æмæ йæ нымайынц. Йæ куыстытæ йын фенын ис æгас дунейы музейты æмæ сæрмагонд коллекциты.
Соскъиты Владимиры сфæлдыстад æмæ культурæмæ цы стыр æвæрæн хæссы, уый фæдыл хорзæхгонд у æхсæнадон æмæ паддзахадон хæрзæхтæй. Йæ фæндаг – аргъ кæмæн нæй, ахæм лæвар, кæцы разæнгард кæны нывгæнджыты фæлтæрты, аивадуарзджытæн ты хæссы циндзинад.
