Маскæтæ, æрмкъухтæ æмæ дезинфекци кæнынæн гæрзтæ. Уыдон сты æнæмæнг æххæстгæнгæ домæнтæ æхсæнадон бынæттæ æмæ транспорты. Специалисттæ æппынæдзух аразынц рейдтæ базарадон точкæтæ, дуканитæ æмæ хæрæндæтты. Ацы хатт Уæрæсейы фæлхасгæнджытæм цæстдарды службæйы кусджытæ уыдысты Кировы районы. Рейды хатдзæгты тыххæй нæ дарддæры æрмæджы.
Дуканимæ æрбахизæны дезинфекцигæнæн гæрзтæ. Æппæт кусджытæ дæр сты маскæты. Санитарон домæнтæ æххæст кæнынц æлхæнджытæ дæр.
Маскæтæ, æрмкъухтæ æмæ метр æмæ ‘рдӕджы бӕрц социалон дистанци. Уыдон сты æнæмæнг домæнтæ. Æххæст сæ кæнынц Елхоты афтекы дæр. Кусджытæн æрвылбон сбарынц сæ буары тæвд. Бæрæггæнæнтæ бахæссынц сæрмагонд журналмæ.
Радон рейды рæстæг Уæрæсейы фæлхасгæнджытæм цæстдарды управленийы специалисттæ хъæуы администрацийы кусджытимӕ иумӕ сбæрæг кодтой цалдæр уагхæлды. Хæстæгдæр рæстæ иуварсгонд æрцæудзысты.
Профилактикон рейдтæ Елхотты аразынц къуыри цалдæр хатты. Специалисттæ адæмы зæрдыл лæууын кæнынц, санитарон æмæ эпидемиологон домæнтæ æххæст кæнгæйæ кӕй ис хи бахъæхъхъæнæн коронавирусæй.
