Абон гауызыл иу иннæмæй хъуыстгондæр спортсментæ. Байаты Давид, Абдулрашид Садуалев, Тимур Бижоев, Заур Угуев – Европæйы чемпионаты ацы богæлттимæ иннæтæн æнцон нæ уыдзæн. Алы уæзы дæр иугонд командæйы ис йæхи фаворит. Афтæ хъуыды кæны капитан дæр. Абдулрашид Садулаев зæгъы, æмбырдтæ цæуынц пъланмæ гæсгæ.
Иугонд командæйы сæргъы богал рагæй ис, 18-æм азæй фæстæмæ. Уый командæйы размæ ракодта Будапешты, Казахстаны, Ослойы чемпионатты. Ныр æм уыцы хъуыддаг æнхъæлмæ кæсы Албанийы дæр. Йæ размæ капитан уыд Сидахъаты Зауырбег, фæлæ хъыгагæн спортсмен командæйы хыгъдмæ нæ бахауд.
Ирыстоны æмбырдтæ сты Европæйы чемпионатмæ цæттæ кæныны фæстаг къæпхæн. Уый размæ къорд тренировкæ кодта Кисловодскы, ныр фылдæр архайынц гауызыл. Сæйраг нысан – куыд раздæр, афтæ ныр дæр сыгъзæрин майдантæ, æппынкъаддæр æртæ, зæгъы тренер.
Фæлтæрдджын спортсментимæ иумæ архайынц æвзонг богæлттæ дæр. Сылгоймæгты фæсивæдон къорд дæр цæттæ кæны Европæйы чемпионатмæ. Æмбырдтæ Ирыстоны скæнын командæйы архайджыты сæхи бафæндыд. Ай у цæттæ кæныны дыккаг къæпхæн.
Сæйраг ерысты размæ чызджытæ ацæудзысты Туркмæ, æппæтадæмон турнирмæ. Зæгъын хъæуы, уый, æмæ Уæрæсейы иугонд командæ ныр дыккаг аз Европæйы у хуыздæр æмæ спортсменкæтæ сæ æмвæзад дæлдæр кæнынмæ нæ хъавынц. Дарддæр æрмæст дунейы чемпионат.
Абоны дæсныйадæвдисæг ахуыртæ амыдта Найфонты Артур. Европæйы æртæ хатты чемпион амыдта йæ дæсныдзинады сусæгдзинæдтæ, фæхай кодта йæ фæлтæрддзинадæй, уый дарддæр чызджытæн æххуыс уыдзæн гауызыл.
