Тайынгæнæн цехы сабыр никуы вæййы. 1960-æм азы уагъд иу вакумон пец, ныртӕккӕйы домӕнтӕм гӕсгӕ ноггондӕй, суткæмæ уадзы æрхуыйы 2 мин къæртты. Йæ хъомыс ныры рæстæджы конд пецтæй къаддæр нæу. Рæстæг кæуыл нæ тых кæны, уыцы кусæнгарзæй завод “Кристалл”-ы сæрыстыр сты. Цæттæ дзаумайы ас бæрæг кæнæн ис сæрмагонд кристаллизаторæй.
Æрхуы фæтайы сахаты бæрц, 15 минуты йæ ныууадзынц æруазал кæнынмæ æмæ уый фæстæ пецæй рацæуы æрдæгцæттæ къæртт. Йæ уæз фæхæццæ кæны 330 кг онг. Алы хайæ дæр сисынц хуызӕгтæ дарддæры химион иртæстытæн. Лабораторон хатдзæгты фæстæ уæлцъар зырнæйзилæн станокы руаджы сцыргъ кæнынц, афтæмæй свæййы рæсугъд бронзæ хуыз. Бафиппайын хъæуы уый, æмæ æппæт ацы архайд экологон æгъдауæй зиан нæ хæссы.
Йæ хъомысмæ гæсгæ æмбал кæмæн нæй, уыцы æнæтуаггуырон æрхуы хорз уадзы электрон тых ӕмӕ тӕвдад. Уый тынг ахсджиаг у нырыккон электрон системæтæ æмæ вакумон техникæтæ аразгæйæ. Ома ныссæсты руаджы згъæр хъæугæ формæ æмæ уæз райсы. Ам дæр ын ис йæхи лыстæгдзинæдтæ. Хæтæлы диаметр æгæр гыццыл куы вæййы, уæд йæ бон у фескъуынын. Ацы къæпхæныл архайд цæуы сæрмагонд пульты руаджы.
Ацы цех та ног цалцæггонд у. Цæттæ дзы кæнынц сæрмагонд профильтæ. Фыццаг лини дзы сæвæрдтой сæрды. Ныридæгæн сты дыууæ. Китайы сæ рауагътой. Цæттæ хæтæлты ис донæн каналтæ. Æрхуыйæ конд профильтæй пайда кæнынц стыр хъомысимæ электрон машинæтæ стухынæн, зæгъæм, генератортæ. Йӕ архайды сæйраг æууæл – температурæ æмбæлгæ æмвæзадмæ æркæнын. Цæттæ продукци стухдзысты къæбæлтыл. Цæгатирыстойнаг завод ацы дзауматæ уæй кæны æгас Уæрæсейы. Европæйы, бæлвырддæр дзургæйæ та Финлянди æмæ Германийы продукци ныртæккæ нал агурынц. Фæлæ профильтæ уæддæр æнæ æлхæдæй нæ зайынц. Кусæнгæрзтыл уадзынц парахатдæр товар. Куысты лыстæгдзинæдтæ хорз зоны технолог Æлхъацаты Владимир.
Ныртæккæ æвæрынц Китайы уагъд судзæн пец. Йæ æххуысæй дзаума æмбæлгæ хуызмæ ӕнцон æртæрӕн у, уымæн æмæ æрхуы æрфæлмæн вæййы. Ахæм хъомысимæ пецтæ куыстуаты уыд, фæлæ уыдысты зæронд æмæ чысыл. Ногтæ стырдæр сты. Завод сног кæныныл бæстон архайд цæуы, фæлæ, кусджыты ныхæстæм гæсгæ, къуылымпыдзинæдтæ дæр ӕййафынц. Фæсивæд сæм нæй. Ног адӕм сæм хæстæг нæ цæуынц. Æнæ республикæ æмæ паддзахады æххуысæй ацы хъуыддаг сраст кæнæн къухы нæ бафтдзæн. Ахсджиаг у кусæг дæсныйæдты кад бæрзонддæр кæнын, ууыл та архайын хъæуы скъолайæ, зæгъынц заводы кусджытæ.
