Скъоламæ нæма бахæццæ стæм, сабиты хъæлæстæ æмæ хъæлдзæг худт та нæм хъуысыдысты. Фæхæстæг стæм, æмæ æвзонг спортсменты чысыл къорд бæндæнтæй арæзт цæлхдурты сæрты хизынц. Кæд сæрд йæ тæмæны ис, уæдæр Змейкæйы 2-æм скъолайы кæрт скъоладзаутæй — дзаг. Райсомы 9 сахатæй сихоры 3-мæ ам вæййынц.
Ахуыры азы кæронмæ сывæллæттæ афæллайынц. Æмæ сæ сæрды фæфæнды æрмæст сæхи ирхæфсын, улæфын. Ам, æцæг, æппынæдзух хъазгæ кæнынц, фæлæ алы хъазт дæр пайдаимæ куыд уа, ууыл архайынц скъолайы. Уæдæ балцы дæр ацыдысты лагердзаутæ сæ ахургæнджытимæ. Суанг ма быдырон хæрæндоны касæй дæр сæхи хорз федтой. Раздзогтæ та сын бацамыдтой цæугæзарды хуызтæ.
Ацы аз 2-æм скъолайы лагерь æрмæст йæхи ахуыргæнинæгты не суазæг кодта, фæлæ ма станицæйы иннæ скъола, Дзæуджыхъæу, Елхотæй сывæллæтты, суанг ма Кæсгон æмæ Мæскуыйаг сабитæ дæр æрбацæуынц ардæм, цалынмæ сæ дадатæ æмæ нанатæм сты, уæдмæ. Æдæппæтæй — 50.
Абон сæрдыгон лагерæн сабитæ зæгъынц хæрзбон. Радæн кæронбæттæн скæныны мадзал хъæлдзæг рауад: æмдзæвгæтæ, уыци-уыцитæ, зарджытæ, ерыстæ…
Хъазт хæрæгсастæй ахицæн æмæ рамбылдта лымæндзинад. Ам æппæт дæр ног хæлæртты сардтой æмæ кæрæдзийæ фæхицæн уой, уый сæ нæ фæнды.
Бæрнон кусджытæ æгас рады дæргъы сывæллæттæн дзырдтой фæндаггон æдасдзинад æмæ закъонмæхъусæг адæймаджы хидарды тыххæй. Стыр æргом — патриотон хъомыладмæ. Æдæппæтæй Цæгат Ирыстоны скъолаты лагерьты хъæлдзæгæй æмæ пайдаимæ ныридæгæн сæ рæстæг арвыстой 12 мин сывæллонæй фылдæр.
