Зындгонд кадæггæнæг Сланты Гаха, сæрмæтаг хæстон лæг, ирон кадæггæнджытæ, кинонывты æмæ Нарты кадджыты персонажтæ, бæлвырд адæймæгты фæлгонцтæ…
Таутиаты Азæйы куклаты тыххæй Ирыстоны чи нæ зоны, ахæм адæм, æвæццæгæн æмæ, бирæ нæй.
Æрæджы мах бабæрæг кодтам Азæйы æрмадз æмæ Ног азы къæсæрыл сымах дæр хонæм йæ «аргъæутты бæстæмæ» …

Адæймагæн йæ миддуне рæсугъд куы уа, уæд йæ алыварс дæр саив кæныныл архайдзæн. Æрмдæсны Къадзты Мæдинæ алцæмæдæр арæхсы. Æнæуд гæххæтты цыма цард бауадзы, афтæ фæкæсы.

Дæхæдæг куы фыдæбон кæнай, уый иу хъуыддаг у. Фæлæ дæм стыр æрмадзы ссæдз адæймаджы куы куса, уæд уым та бынтон æндæр зонындзинæдтæ бахъæуынц. Хи куыстуат саразынæн бирæ ныфс хъæуы, æмæ разындис æрыгон Бетрозты Азæмæт æмæ Гергиты Русланмæ.

Фыдæлтыккон дзаумæттæ, куысты хуызтæ æмæ цардархайды æгъдæуттæ сæфгæ нæ кæнынц. Чи сыл фæауды, ахæмтæ цыфæнды рæстæджы дæр вæййы. Се ‘хсæн Джихаты Фатимæ дæр.

Цæгæраты Марат Ирыстонмæ сыздæхт, цæмæй ам йæ куыст парахат кæна, уый тыххæй. Фæнды йæ, цæмæй æндадзæджы куыстыл фылдæр фæсивæд фæхæст уой, уый. Цавæр зындзинæдтимæ фембæлы, уый тыххæй махæн радзырдта.

Æгайты Фатимæ у дæсны куклатæ аразæг. Канд уарзон куыст ын нæу, фæлæ ма хи ирхæфсыны мадзал, стæй адæмæн лæггад кæныны фæрæз. Йæ куклаты фæлгонцтæ йæхæдæг æрхъуыды кæны. Ныридæгæн Фатимæ сарæзта Кавказы æппæт адæмæхæттыты гыкъынатæ.

Зæрдæйы аивады апп куы уа, уæд йæ афоныл тала суаддзæн. Афтæ рауад Челæхсаты Софияимæ дæр. Нывкæнынады ахуыртæм никуы цыд, райста медицинон дæсныйад. Фæлæ йæ зæрдæ гыццылæй дæр аивадмæ æхсайдта. Рæстæг æрцыд, æмæ йæ саби бонты бæллиц сæххæст кодта. Абон София у æрыгон нывгæнæг. Уыдис ын фыццаг равдыст дæр. Нæ программæ «Æрмадз»-ы нын йæхи дæнцæгæй равдыста, курдиаты фæндыл цæуын кæй хъæуы, уый.

Дзалаты Альберт зæрингуырд у йæ зæрдæйы фæндонмæ гæсгæ. Лæмбынæг æмæ лыстæг куыстæн æнцонæй быхсы, стæй йæ уарзы. Йæ ныхæстæм гæсгæ, æхца бакусын сæйрагдæр нæу. Æхцондзинад ын хæссынц, цы рæсугъд дзаумæттæ саразы, уыдон.

Ныртæккæ бирæтæ кусæг дæсныйæдтыл стырзæрдæ систы. Электриктæ, аразджытæ, æндадзджытæ æмæ механиктæ адæммæ кадджын нал кæсынц. Фæлæ Гокъоты Сергей сфæнд кодта æндадзæгыл сахуыр кæнын æмæ иу хатт дæр нæ фæфæсмон кодта.

Гугкаты Темболат йæ дæсныйадмæ гæсгæ инженер-электрик у. Фæлæ йæ зæрдæ дизайнеры куыстмæ ахсайдта. Цалдæр азы æндæр горæты фæцарди, фæлæ фæстæмæ Ирыстонмæ ссыди. Йе сфæлдыстады зынгæ бынат ахсы национ темæ. Æмæ уыцы хъуыддаг бæтты, адæмы зондахаст хи культурæ базонынмæ кæй тырны, уыимæ. Йæ куысты æмæ нын йæ зæрдæйы сусæгдзинæдтæ раргом кодта нæ программæйы.